Tamiya - 1:20 Ferrari F189 (Early Version) w/ SMS Seatbelt harness (part 2 of 2)

‧‧‧還有一個禮拜就到齊齊砌聚會，要的起心肝攪掂埋啲戰車，繼續砌埋上次架拉利，話說上次架車已經完成好車身嘖油和砌好前搖臂，跟着就開始砌車裏面。

引擎
引擎主體噴上自行調教的暗銀色，變速箱部份則噴上半啞黑(#92)。 依據參考圖片加入有關電線、喉管等的細節。


散熱器及喉管

車身兩側的散熱器有幾條很顯眼的喉管連接着,但模型沒有提供，唯有自行加上。用膠片整幾個散熱器喉管的連接口。


初初整左面的喉管用焊錫做，好處是夠軟易屈，但大力少少都會變咗形，所以做完左邊的喉管後右邊的喉管轉返用銅枝做。接駁位的膠喉是用電單車模型用剩的粗橡膠喉加錫紙膠紙條做喉索。根據參考圖片屈出左右共六條喉。


車呔

車呔處理，首先做賽車車呔的指定動作──磨轆，用銼和粗沙紙將車呔面上的分模線磨走兼將表面磨得粗糙切合番真呔的表面。


因沒有了車呔的logo貼紙，唯有買塊車呔logo蝦片回來自己噴，首先將車呔表面略略打磨，然後用白底油直接噴上。這是第一次噴唔係好熟手，有很多次個logo唔係走咗位就係啲邊邊化咗(貼唔實)，要抹咗重新再噴，都幾煩和花時間。最後都終於可以勉強收貨，噴好後忍不住裝上架車到看看。


其他
攪埋其他細節包括引擎艙其他電線，加埋條安全帶，架車可以趕得切落場啦！









之前製作過程：

Tamiya - 1:20 Ferrari F189 (Early Version) (Part I) w/ Museum Collection decals