Tamiya - 1:20 Ferrari F189 (Early Version) w/ SMS Seatbelt harness (part 2 of 2)

‧‧‧還有一個禮拜就到齊齊砌聚會，要的起心肝攪掂埋啲戰車，繼續砌埋上次架拉利，話說上次架車已經完成好車身嘖油和砌好前搖臂，跟着就開始砌車裏面。

引擎
引擎主體噴上自行調教的暗銀色，變速箱部份則噴上半啞黑(#92)。 依據參考圖片加入有關電線、喉管等的細節。


散熱器及喉管

車身兩側的散熱器有幾條很顯眼的喉管連接着,但模型沒有提供，唯有自行加上。用膠片整幾個散熱器喉管的連接口。


初初整左面的喉管用焊錫做，好處是夠軟易屈，但大力少少都會變咗形，所以做完左邊的喉管後右邊的喉管轉返用銅枝做。接駁位的膠喉是用電單車模型用剩的粗橡膠喉加錫紙膠紙條做喉索。根據參考圖片屈出左右共六條喉。


車呔

車呔處理，首先做賽車車呔的指定動作──磨轆，用銼和粗沙紙將車呔面上的分模線磨走兼將表面磨得粗糙切合番真呔的表面。


因沒有了車呔的logo貼紙，唯有買塊車呔logo蝦片回來自己噴，首先將車呔表面略略打磨，然後用白底油直接噴上。這是第一次噴唔係好熟手，有很多次個logo唔係走咗位就係啲邊邊化咗(貼唔實)，要抹咗重新再噴，都幾煩和花時間。最後都終於可以勉強收貨，噴好後忍不住裝上架車到看看。


其他
攪埋其他細節包括引擎艙其他電線，加埋條安全帶，架車可以趕得切落場啦！









之前製作過程：

Tamiya - 1:20 Ferrari F189 (Early Version) (Part I) w/ Museum Collection decals

Fujimi - 1:24 Mazdaspeed Roadster (1)

最近有朋友入咗部iPad下載了些遊戲，其中一款駕車遊戲左右搖吓架機架車就會左右轉彎，幾過癮但就超難控制，每次玩都好似醉駕咁左搖右擺，撞完左邊就撞右邊！每次都係包尾大班過終點，都幾有挫敗感！

那位朋友在遊戲中買了架車車，係萬事得嘅MX5，揀了金屬粉紅色油作車身顏色，雖然隻色有啲騎呢，但睇落又好似幾獨特。有見及此，想臨朋友生日時砌番架類似顏色的車送比佢。


以富記已往鑄模模式，這盒模型在分件上都算散，車頭車尾和裙腳部份都是分開倒，引擎艙內的細節都做得頗精細，泊得住孖星的水準。

首先是將車頭、車尾和裙腳裝上，車頭蓋是嵌入車頭的框框內，所以也要預先試裝上度位。車殼的parts裝嵌上倘算冇乜問題。


車底的細節也做得幾好，但可惜砌好後睇唔到。


攪掂車底後砌引擎，都是照著說明書砌。車身噴上白色底漆後先噴上粉紅色(#63)，然後再噴上透明銀色(#159)。這種顏色會改變粉紅色的鮮艷度，噴得不平均更會出現一撻撻深淺色的現象，所以噴時離車身遠點和盡量輕手點，期間要常常留意整體顏色的色調是否平均。座椅和軟蓬(雖然遊戲機中的車沒有蓬)則噴上遊戲機中的深啞啡色(水性油#406)。


車廂方面本來想配合番座椅的顏色，但最後都是選擇了全黑色。儀錶版中央噴上深銀色。

車殼噴了光油及拋光後，黐埋車玻璃、燈和其他零件以為已經攬掂，但細看下原來車頭燈對落的兩盞射燈框框、車頭和車尾最底底都是不同顏色的，唯有將車殼又大包圍一番噴好佢。與此同時，模型所提供撐住車頭蓋的鐵支(膠做)太粗，所以自行用鐵線屈番條代替。


攪掂埋之後，終於可以完工及趕得切在朋友生日時送比佢。但聽聞朋友現在已經升咗呢，換咗車啦！

相關網誌：

Eunos Roadster (Mk. I)


Mazda Roadster RS (NB8C) (Mk. II)


Mazdaspped Roadster (Mk. III)

Mazda Roadster MX5 (Mk. IV)