Fujimi - 1:24 Ferrari 512 BB

好耐冇砌過拉利模型啦，今次砌架七零年代的中古型號的512 BB，架車最特別的地方莫過於車頭兩盞超大size的方向燈及唯一一架用上雙色車身的拉利街車。雖然單色車身睇落較討好，但雙色配搭 (紅或黃配黑) 則夠獨特。

這款模型之前好似未見過，所以應該是新開發的。再者，在車殼的質素唔錯找不到明顯的分模線，所以應該不是復刻版。模型的精細度一般，但很出奇地有埋安全帶插頭，副偈造工就求其，總之一貫富記非EM系列模型嘅水準。

首先是剪下及打磨需要噴底漆的啪士，全部都是車殼和內籠的parts。所有都先噴上灰色底漆，車殼的parts再加多一層白底漆。


車身顏色方面已有定案─噴黃加黑色，內籠則噴棕啡色。首先車殼噴上黃色(#4)和內籠噴上棕啡色(#44 + #7 + #108)。


車殼貼好水紙後噴上光油，趁等光油乾透期間砌好車廂。


光油乾透及打磨後，可以噴埋第二隻主色─半啞黑色(#92)，並噴埋其餘需要噴黑色的parts。包括車底、引擎支架、車尾蓋上兩條panels等。


引擎造工唔係咁精細，又唔想花時間去攪好佢所以只係直砌。放且如果車尾蓋和車身唔係咁啱位的話，分分鍾會黐實佢，引擎就變咗不見天日！


如之前所料，車尾蓋真的唔係好啱位，車尾與車身合埋後有一條很闊的空隙，所以唯有將車尾黐死。此外伸縮車頭燈亦都唔係咁貼，所以也一併黐埋。攪埋啲手尾，又攪掂一盒模型！！