Fujimi - 1:24 Toyota bB Styling Project Ver. A (Restore painting)

繼前排番砌Boxster和350Z後，又搵來一架之前砌得唔滿意的模型番砌，今次係兩年前砌好的Toyota bB。一睇架車就知最失敗嘅地方係車殼，本來想噴兩隻色，由車頭的黑色漸變到車尾的銀色，但唔識噴，噴唔到漸變嘅效果，攪到前後兩折色。番噴前先來張遺照，日後有得比較。


今次番噴打算連車廂都攪埋，所以除了拆除車殼上的啪士外還要拆埋車廂內的。車殼除尾部拆唔開外，其餘部份都很易拆除；但車廂就有點困難，因座椅已黐死咗拆唔甩，幾要用据強行据開！


又用上次式式薯條大洗底法去除油漆，兩試兩零！


又係十零廿分鐘，車殼又回復原本膠殼顏色順便洗埋套拎！用綿花點開油水清除埋殘餘的油漬，再用清潔劑洗淨。車殼又可以重新上色啦！


車殼和內籠都係黑色，噴甚麼顏色(除黑色)都要徹底隔開底色，灰畢地遮蓋力會好啲。因唔打算噴淺色，可以慳番唔使噴白色畢地。


來到上色步驟，呢部車我覺得除了黑色外，好似冇乜其他顏色襯得好睇，但又唔想成架黑猛猛咁單調，所以又試吓玩雙色車身，初步定案係粉紅夾黑色，上半部份噴粉紅；下半部份噴黑。唔知好唔好睇咖，一路噴一路諗啦！

首先車身上半部噴上粉紅加珍珠油，因又想玩吓漸變色，所以將粉紅色噴的範圍擴大至大半個車身，噴好後覺得隻色麻麻地。


漸變色又告失敗，所以索性將整個下半部噴全黑。為求特別啲，我用了啞黑色。噴完後發覺用啞黑色頗突顯到隻粉紅色，但靚唔靚就見仁見智啦！早前噴粉紅色時因忘記順帶噴埋光油，所以又要包番實黑色部份噴光油！


車廂沒有甚麼大攪作，只是將所有啪士噴上黑色然後黐番埋。車拎方面中央塗上啞黑色趁番車身顏色。


車殼經打磨拋光和噴上窗框後將所有啪士黐番上去，又翻新好另一架車車，今次呢架啲顏色配搭比較騎呢，但自己覺得幾ok呀！











一連番新了三架舊車車，要暫時停吓，下次要砌番新嘅車車啦！

Tamiya - 1:24 Nissan Fairlady 350Z (restore painting)

早前為架Boxster洗底洗上癮，今次又攞幾年前砌好嘅車車出來重噴。當初車身係噴上橙色加珍珠綠反光油，睇落怪怪的，都唔記得點解當時會咁搭法，隻色好似同架車唔係好夾，噴好後唔係好鍾意，所以之後就求求其其地砌完佢。今天拿出來看發覺原來當初求其到連座位都冇裝到！

今次重組只限於重噴車殼和擺番兩張椅入去(如果仲搵得番嘅話)，冇之前架Boxster咁大工程，因其餘部份都冇乜嘢需要重噴。

第一步是去除原本的橙色油，但未除油前先將所有附著物包括金屬件拆除好彩樣樣都拆得甩冇爛到，將所有細啪士收藏好。


舊顏色車殼的最後遺照...


轉轉話題，初初睇370Z的外觀和350Z差不多，淨係得盞頭尾燈唔同咗，但併埋一齊後發覺原來整體都頗有分別... 開始洗油，初初攪到好「呢hea」用來載開油水的膠袋漏水，攪到成枱都係，好彩周圍冇其他着色膠件，如果唔係就損失慘重囉！之前因噴了底漆，所以特別難洗，捽咗成晚都淨係洗咗個車頭蓋咁多多。


繼續洗油工序，慢慢捽實在太費時啦，要改用第二個辦法 ─ 嘗試轉用式式薯條去油法。在超市買了盒大碼密實袋，倒入適量開油水後放入車殼大式特式。浸過一會後式吓捽吓個袋。不消十五分鐘全車已回復真身啦, ye!


雖然已回復真身，但其實車身還有薄薄的殘餘漆油，用綿花沾開油水徹底清除。清除後再用清潔劑洗淨後可以重噴底漆啦。因未決定噴甚麼色，所以噴多層白色底漆預留噴淺色的可能。


車身顏色初步已有定案，又係想玩吓雙色車身，今次選擇以黑配金屬橙色。車頂和頭冚會噴黑色、其餘部份噴銀加透明橙色(這種噴法之前已經試過，效果唔錯 (見: Fujimi - 1:24 Honda CR-X del Sol VXi (Test colour project))。全車先噴上銀底油，再噴上稠稀了的透明橙油，噴時調低了氣壓薄薄地逐層噴避免某些地方會噴得重手得滯攪到一撻深、一撻淺。正因用低壓噴，表面完全是橙皮紋但又不能夠作任何深層打磨及拋光，驚磨薄了橙色層會變淺色咗，只是用幼沙紙磨走黐在表面的毛塵，然後噴光油。


清除哂所有污垢後發覺全車淨係用呢隻金屬色睇落都唔錯，所以決定轉用Plan B顏色，即係唔噴黑個頂和頭冚囉！此外，已經响堆填區中搵番兩張座椅啦，原來之前已經噴了底漆，但唔係好厚，所以要加多層。


兩張椅已搞掂及擺番落車廂，終於有位座唔使企响度咁辛苦啦！


噴好光油及拋光後，黐番所有啪士落去，番噴過程總算完成，全車煥然一新。比較之前噴那隻橙色，覺得呢隻色襯架車多啲，幾滿意！查實真車都好似都有隻咁上下嘅金屬顏色選擇。









兩代淑女外型比較，兩者都各有所長，我比較喜歡300號佳麗多啲。