呢盒模型大大話話買咗有七年以上，又係一時衝動買的，買咗返來擺响籠底，係最近大執拾後先見番光，連張製作圖都有少少變黃。見盒模型簡簡單單唔係咁多嘢砌，把心一橫諗住快快手攪o店佢清咁盒存貨。
第一眼睇到車身啲線位唔係好清楚，要全部刻過哂。車頂兩條軌太貼近車頂上色唔係咁方便，而且軌下車頂有條好明顯嘅分模線，所以唯有將兩條軌鋸走，上好色後才黐番上去。執執啲鋸口後就噴底漆。
車殼噴我早前砌嘅大劈蔗佬一樣──銀色中間夾條深綠色。噴完之後發覺呢隻綠色太深，似黑色多過似綠色！
天氣潮濕，光油要遲吓才噴，所以轉頭整車底和內籠。車底係一塊過，所有細節都啤埋一齊。整塊車底先噴上啞黑色後再將細節油上唔同顏色。
內籠先噴上底漆，然後噴上淺灰色(Gunze #35)，再執埋啲黑色部份，內籠又攪o店埋。但天氣持續潮濕，還未噴得光油。
既然未噴得光油，唯有將架車陷埋一齊先，發覺完來未陷哂個車殼落去個車底架車仲型仔，即係如果架車如果load高咗更加型，可惜呢盒模型做唔到呢個效果！
終於等到今日天氣冇咁潮濕，嗱嗱林攞架車去噴光油，噴完光油後攪o店埋其餘啲細parts‧‧‧又清多一盒。砌好之後又覺得架車唔係咁差喎，拍埋落架大、中劈蔗佬到都幾相影成趣喔！
劈蔗一族
點解好似咁細部的.... 一d都唔似1:24喎...
ReplyDelete[版主回覆04/03/2009 01:25:00]我都唔知喎，既然話得係mini照計應該鈿過大劈一個碼啩！我將佢泊落架Jimny到兩架嘅size又差唔多喎。可能唔同廠出品，size都有啲出入啩？
有劈蔗佬，仲有劈蔗仔添！
ReplyDelete[版主回覆10/20/2009 03:23:00]劈呀！劈呀！大有大劈，細有細劈！總知你劈佢劈人人劈！