Educa - Puzzle 2000 Panorama (Cans) Part 2

上星期終於砌完啦！今日還裱埋入埋架，成副砌圖用咗差不多廿個鐘砌好，都算快啦不過副砌圖有好多圖案所以唔難砌。但面積咁大幅唔知掛响邊度好，唯有暫時將它收藏好遲些再作打算！

Educa - Puzzle 2000 Panorama (Cans) Part 1

一連四日嘅復活節假眨吓眼又過去，四日假期都係留港消費。有日行街去到一間賣砌圖的舖頭，見到一幅完成咗以汽水罐做主題嘅二千塊砌圖好吸引，幅砌圖好長，砌好後有成136cm x 48cm ﹝約四呎半乘一呎半﹞咁大。連埋畫框盒砌圖賣成幾嚿水，因一時興起，所以就立即拍板買盒虐待吓自己。運送途中都幾「論盡」一手攞住盒砌圖；一手攞住個大畫框去搭巴士，好彩架巴士冇人搭，可以將個畫框佔哂成張後排位。
經過四日停吓砌吓終於完成咗八成，但餘下嗰兩成都幾難砌。

Fujimi - 1:24 Mitsubishi Pajero Mini

呢盒模型大大話話買咗有七年以上，又係一時衝動買的，買咗返來擺响籠底，係最近大執拾後先見番光，連張製作圖都有少少變黃。見盒模型簡簡單單唔係咁多嘢砌，把心一橫諗住快快手攪o店佢清咁盒存貨。

第一眼睇到車身啲線位唔係好清楚，要全部刻過哂。車頂兩條軌太貼近車頂上色唔係咁方便，而且軌下車頂有條好明顯嘅分模線，所以唯有將兩條軌鋸走，上好色後才黐番上去。執執啲鋸口後就噴底漆。


車殼噴我早前砌嘅大劈蔗佬一樣──銀色中間夾條深綠色。噴完之後發覺呢隻綠色太深，似黑色多過似綠色！


天氣潮濕，光油要遲吓才噴，所以轉頭整車底和內籠。車底係一塊過，所有細節都啤埋一齊。整塊車底先噴上啞黑色後再將細節油上唔同顏色。


內籠先噴上底漆，然後噴上淺灰色(Gunze #35)，再執埋啲黑色部份，內籠又攪o店埋。但天氣持續潮濕，還未噴得光油。


既然未噴得光油，唯有將架車陷埋一齊先，發覺完來未陷哂個車殼落去個車底架車仲型仔，即係如果架車如果load高咗更加型，可惜呢盒模型做唔到呢個效果！


終於等到今日天氣冇咁潮濕，嗱嗱林攞架車去噴光油，噴完光油後攪o店埋其餘啲細parts‧‧‧又清多一盒。砌好之後又覺得架車唔係咁差喎，拍埋落架大、中劈蔗佬到都幾相影成趣喔！







劈蔗一族