Revell - 1:24 BMW Z8

一連起咗幾盒爛尾舊模型，想開番盒新嘅o黎砌吓。呢盒模型唔算係新買嘅，响零一年已經入咗，但因為未「鬥」過，所以就算係新模型嘅。呢架係寶馬五十年代的507型號嘅現代版(我架507爛緊尾)，所以都有啲五十年代的古典味。呢盒模型係利華出品，砌過利華嘅都知道呢間廠啲質數唔係好o店，呢盒都唔例外，一睇到個車殼啲火都熄咗半截，前後避震又做得粗糙，車呔拎立立，殺車碟求求其其，還有‧‧‧唔怪得冇廠出過呢盒模型的改良部件，所以我都諗住齋砌罷啦。車身顏色用黑色配車廂紅黑兩色。

製作過程

第一日　《九月十六日　星期二》：今日都整咗好多嘢包括磨去車殼上的水口線；開哂車頭車側啲入風和出風口；為車底上色；所有內籠部件及車拎上灰。至於座位因夾口太大所以要用搞搞佢先可以上灰。


第二日　《九月十七日　星期三》：將車身上色，上色期間唔小心跌咗落地，好彩只是花咗少少唔使大執，磨番滑後噴多兩層色應該ok。此外將錶板及門內壁黑色的部份上油，轆拎上銀色等等。

第三日　《九月十八日　星期四》：將今日淨係將椅背的夾口用畢地填好，然後噴番好個車殼。

第四日　《九月廿三日　星期二》：磨番滑座椅後的畢地。因同時間開咗另外一盒模型，所以影響咗進度。

第五日　《九月廿八日　星期日》：今日趁天氣乾乾地攞個車殼去噴光油，噴咗兩層薄油才發覺原來未貼車頭/尾徽章，好似已經唔係第一次，真大頭蝦！好彩只係噴咗兩層薄油啫。

第六日　《九月廿九日　星期一》：秋天已到，天氣乾燥，係噴光油的好時候。貼上車頭/尾徽章後略加打磨車殼，再噴上多幾層光油。跟着順便為車廂上色，主色為半啞紅和黑色，可能因為打咗灰色畢地，所以隻紅色睇上來較暗啞，都好嘅太鮮艷反而唔似。之後發覺原來噴漏咗個防滾架，唯有打後用手油番。執執車廂其他顏色部份，除座椅兩旁還需要噴黑色外，車廂整得七七八八。


第七日　《十月三日　星期五》：用手油埋座椅兩旁黑色，背噴銀色 (但安咗落架車後都睇唔到)，車廂大功告成。剩番擋風玻璃和幫個車身拋光後就攪o店。

第八日　《十月八日　星期三》：今日攪埋啲剩餘嘅工序，發覺原來棧尾燈和前指揮燈都係冇燈罩，只係靠張水紙效果唔o店，唯有用手銀色打底，再用透明紅/橙油作燈罩。好彩燈面積唔係好大，所以都勉強可以接受。兩盞車頭燈是相連的，試裝後發覺唔啱位，所以要剪斷獨立安裝。燈罩和車身亦都唔係咁fit，但唔係太離譜，所以用膠水黐住佢算數。車底和車殼墈埋好艱難，因為車殼好厚好硬好難撐開，而且又唔係咁fit。之後裝埋擋風玻璃，水撥，倒後鏡等，之後又發覺原來個頂篷未上色。真激死!

第九日　《十一月一日　星期六》：今日終於噴開啞黑色，可以順便噴埋個軟蓬。總結對呢盒模型不抱太大期望，可能因為係利華貨，質素麻麻，墈得埋和唔駛點大改都已經要還神。