拉利的360 Modena之前已經砌過兩次，一次砌硬頂版；另一次砌開篷版，兩架都係齋砌冇加工。
過了咁多年後再砌今次試吓自行動手改裝改造成 360 Challenge Stradale ("CS") 版本，即Modena 的加強版。表面上CS版和普通硬頂版只是頭唇和裙腳有點不同；尾燈panel改用了金屬網；車轆轉用了BBS拎，當然在細心比較下有好多處地方都有差別。車廂佈局更加大不相同。
Museum Collection曾經出過CS嘅手版膠嘅改造套件但已停產咗好耐，況且根據討論區其他模友講套件要花頗多時間去磨合才可砌得到。既然冇改造套件唯有自己動手scratch build，雖然唔保證可以整得百份百準確而且唔係樣樣嘢都能夠造得到，但都盡量根據參考圖片整，此外車轆和車椅都是從另一盒模型轉過來用。
所用的配件：-
Tamiya - 1:24 Ferrari 360 Modena
Fujimi - 1:24 Ferrari F430 option parts version (seats & rims only)
首先攪個車尾蓋，CS版尾部擾流拱起的程度較普通版高，而且拱起部份不止於末端而是伸延至車尾窗方向。
先用膠條増加高尾蓋末端的弧度再用補土塑造出大約拱起部份的形態。然後再磨出拱起部份的形狀。
普通版尾蓋兩側的散氣係網；但CS版則是在網上加多一條有四個窿的碳纖冚。
最後加埋在CS版獨有的兩條bars。
引擎蓋的玻璃在CS版沒有發熱線紋，要磨走。但其實發熱線紋是錯的，普通版都唔會有，事關引擎蓋上根本不需要有發熱線。
車身
來到車殼，在不同的位置上加上補土，車尾底部和裙腳需要改裝的體積不大用普通補土已足夠。
車頭泵把，在比較普通版之下，CS版的入風口較普通版扁小小。
車頭泵把位改裝體積較大，初初選用普通補土造型但打磨上唔係咁易，最後決定清除哂所有補土重新改用膠條及補土塑造出CS版大約不同的形狀，再慢慢用銼和粗沙紙磨出番應有的形狀，因唔係十分掌握得到突出的形狀，我先整了一邊，參考結果再整另一邊。
兩邊泵把位都完成。
CS版車尾車牌位係梯形唔係普通版的長方形。
車底
CS版車底尾部有air vents。但因只得一張參考圖片而且還是勉強看到的關係，唯有加點想像力用膠片覆製。
車殼初步改造大致完成，執埋啲甩漏可以上色。
來到上色程序，在這階段還未決定車身會噴甚麼顏色，不過相信都係大路嘅紅或黃色。最具挑戰性嘅係中間白色間裏面極幼嘅紅綠色間條(冇貼紙唯有自己油)，度位要確保間條在正中央及車頭、頂、尾部份都係連貫直線。車身噴了底漆後在中央噴上白油，度好哂位黐好膠紙後髹上紅綠間條。
待續...
No comments:
Post a Comment