Taimiya - 1:35 Bristish Army Chieftain Mk. 5

砌車砌得多悶悶地轉砌吓另一類別的模型，今次找來一架坦克車模型。記得細個曾經砌過一架，但甚麼型號已經唔記得，印象中好似 係 孖星1:35系列，有摩打，車頭掛有後備履帶，兩側車轆則有檔板，有啲似Centurion，但孖星的 Centurion只有1:25，所以唔係好肯定。

冇乜幾可砌 坦克加上對此類車亦冇乜硏究，完全係初哥一名，所以只是平平地買盒試吓過吓手癮。砌坦克唔做舊化即等如砌車唔上色，所以今次會嘗試吓做吓舊化，希望唔會整得太難睇。

開始製作，首先要攪嘅係摩打時代遺留下啲車底窿窿，雖然位於車底，但車底離地面高若低炒都有機會見到，所以都係咁依封一封佢。比較細的三個用補土填滿；大的兩個先用膠片封底，再用補士填平。


先將所有附著車身上的零件預先黐好，炮管去駁口。


車兩側檔版上的手挽做得太過求其，決定鏟走哂然後自行用鐵線整番啲手挽，左右兩邊加埋有四十多個，但實際掘咗五十個以上好多時都在安裝時飛走咗！


炮塔兩旁連接煙霧彈發射器的倒模連接線又係做得太求其，頂唔順又鏟走佢再用幼電線代替番，效果好過原裝。


履帶好膠亦唔夠細緻，遺憾沒有代替品，唯有用顏色改善吓外觀。先用dark copper (XF-28)塗上 履帶的金屬部份，再乾掃上flat aluminum (XF-16)凸顯因磨擦露出的金屬底色。全條履帶底面再噴上一層鋼鐵色(#28)。

用手塗方式油上補土底漆來顯示車身粗糙表面，車旁燈箱自行加上門鉸使它可以自由開合。然後全車噴上基本底色─深綠色(#330)。


瞭望塔頂周邊改用塗了深藍色(#6)的膠片遂一黐上。


用鐵線屈出機槍挽手。


再用鐵線屈出車身某些地方的扶手


全車噴上迷彩，本來想噴一撻撻深灰色，但點知買回來隻油(#125)原來係好深嘅藍色，冇法唯有照噴，噴好後用稀釋了的 深綠色(#330)再薄 薄地全車再噴一次，發覺一啲都唔似係藍色。


本來唔想擺人仔落架車度，但諗諗吓既然有比埋就唔好嘥，上好色放上去後效果又唔錯噃！


來到車輪，只是照說明書上色，因表面不需太平滑，所以全部都是用筆塗，慳水慳力。


完成得七七八八了可以開始做舊化，但自問對做舊化唔係好在行所以唔大攪了，而且大攪要買多啲其他材料，第日一旦唔再砌坦克啲材料就會擺响到嘥咗兼阻定。我嘅所謂舊化是指將全車噴上不同程度深淺嘅泥黃色而已，人女效果雖然唔講得係逼真，但對我這個新手來講都算係掹車邊合格啦！噴好後加埋車身上其他細節，完成今年第五份作品，已經平咗上兩年嘅紀錄啦！

今次初學人砌坦克覺得都幾好玩冇砌車咁單調，但如果要砌一架像真度極高嘅作品相信要花相當的時間去鑽研，而且材料和顏料方面又是另一筆開支，在模型材料越賣越貴的情況下，我諗我都係砌哂手頭上嘅車車模型先再算啦！