呢盒係田宮三十年前出產的復刻版模型，我做學生哥時都買過一盒砌，當年都幾鍾意呢盒模型，一來架車夠吸引，二來唔使點上色都可以砌出同盒面差不多一樣的實物，而且行得走得，當時對模型的真實感要求好低，砌好後郁得已經好開心。當時盒模型包埋摩打，電線和司機公仔的，砌好後裝上電池可以玩上大半日。
雖然復刻版電池箱和摩打位都完完整整保留番响度，但摩打，電線和司機公仔就全部剔除哂，然而價錢卻高過當年的九倍之多(嗰時賣大約$15)。雖然就算今時今日盒模型包埋摩打我都未必會裝上去，但感覺上好似唔齊全。
今日再買番呢盒模型砌發覺原來其造工都幾粗糙，模線多不在話下，連啲門窗邊都唔係咁平滑。不過畢竟佢係三十多年前技術產品，所以亦無可厚非。
今次再砌我會著重於整好個車殼，其他不顯眼的地方不會花時間去改良。
首先要做的當然是將整個車殼又頭到尾用沙紙徹底打磨，因模線實在太多太明顯，為求快捷，我用了最幼細磨蝕了的木沙紙打磨(212粗度)。之後用電磨磨薄所有沙版邊位和開哂引擎蓋上的窿窿(pic 1,2,3)。
車底和前後懸褂方面，基於模型原本是設計裝摩打的，所以整得很求其，加上砌好後又唔顯眼，所以只是依照說明書上的方法上油算(pic 4)。
引擎艙又係求其過求其，所以冇花心思去改良佢，況且不打算完成後打開引擎蓋。
內籠方面打算噴淺啡色來切合番七十年代林寶堅尼一般內籠的顏色。尾燈雖然有水貼紙但效果很假，所以都係用手上油好睇啲。
所有車殼、內籠部件先用灰色底漆來遮蓋深藍色的車殼，因為灰色畢地遮蓋力較強，乾後將車殼略略打磨再噴上白色底漆。至於內籠因會噴上較沈的顏色，所以淨用灰色底漆打底已足夠 (pic 5)。
車身的橙色用上郡氏59號，因其色澤偏紅幾接近資料圖片內的橙色車身，所以沒有混入其他顏色直接噴上(pic 6)。
噴完光油後，引擎蓋窿窿用啞黑色膠片封番。
因車身黑色部份好難用噴鎗噴所以唯有用手慢慢油，油到眼都突
。
用透明紅、橙油油尾燈點都真實過用水印紙。
攪埋啲細節，終於完成。
總結
雖然盒模型好少部件好易砌，幾啱初學者，但若要整到佢靚靚仔仔就要花多啲耐性和心機，因有好多部份都冇分開倒模(尤其是車身黑色部份)所以幾花精神上油。
