Model R.I.P.

The shelf used for displaying my completed models is seriously running out of space, which caused the recent completed models do not have a home to go, therefore, some of the aged models have to be "archived" to free up space for the new ones.  I wash off the models before putting them to an empty model box.  I put a bag of dessicant before putting them in the dark.

Old Models R.I.P., Amen...
After rearranging the shelf, it still short of space, therefore further aged models need to sacrify.

Showtime

Hasegawa - 1:24 Ferrari 250 Testa Rossa (Diary)

我一向都幾鐘意五六十年代的古董車尤其是歐洲車，當中以法拉利和積架兩個品牌是我的至愛。當時的汽車由內至外全部都是用人手設計和打做，所以我覺得除了可以駕外，還可以當一件件藝術品來欣賞。相比現時的汽車全部都用機械化設計，務求達到最快，最少風阻系數，所以架架車都冇乜Character (唔知中文點叫)唔係咁襟睇。唔係話唔靚但硬係冇咗嗰份藝術氣質。

在一比廿四比例的塑膠模型世界中，五六十年代的古董模型車寥寥可數，大部份模型廠都集中生產現今最新最罕有又出名的車種。尤其是日本車，GT-R 和Z35便是表表者，三間模型廠都差不多同一時間推出反而覺得唔冇咁矜貴。所以每逢聽到有五六十年代的歐洲古董模型車會出時，我都唔會錯過。雖然一比廿四的手辦模型會有多一些選擇，但其價錢實在太乸利，所以唔多會考慮。

講咗咁多口水，這盒模型是五十年代的法拉利跑車，佢嘅威水史蹟响呢到唔多講啦。當知道長谷川這間難得出汽車模型的廠會出這款模型車時，我一直都唬到實。最終我總共買了兩盒連一盒長谷川蝕刻鋼線拎和一份Hobby Design出的蝕刻片，但份HD蝕刻片啲質素就唔係好o店，最攪笑嘅就係份嘢淨係比咗塊蝕刻片做內膽，但冇比埋輪圈。嘩，大佬，玩嘢咩！？

第一盒模型已經响早幾個月前開咗工還砌咗一半有多，我用了長記嘅蝕刻片鋼線拎。我記得當初係因為要為個車身噴光油，但碰啱果陣時的天氣很潮濕，跟住個泵又壞埋，所以一路都擱置咗唔砌住。本來想等到整番或換咗個泵先至噴光油，但我到現在仲未捨得買個新嘅，所以唯有繼續用住罐裝油頂住檔先。
架車已經砌得七七八八，車底、引擎、轆都已經搞o店。未砌部份包括車身埋尾、內籠、椅、自制的簡單引擎添加部件等。

製作過程

第一日 《九月三日 星期三》：為車身和車頭蓋噴光油，噴完才發覺漏噴了車身兩旁出風口的部件，唯有等下次補噴。放且車身都要噴多一兩層光油先至得。

第二日 《九月四日 星期四》：再為車身和車頭藎噴光油，初初噴第一浸時車身表面朦哂，即刻用風筒吹，好彩好多地方都拎番，再噴多一兩層表面已經冇同樣現象發生，待乾透後打磨拋光睇吓個效果O唔OK，如果OK嘅就算啦，因為唔想噴咁厚光油。

第三日 《九月五日 星期五》：車頭入風口响真車上係一塊金屬網，但模型就以一塊有網紋的實膠代替，通常在我都會挖空中間(pic 1)然後裝番塊真的金屬或尼龍網片(pic 2)，何況呢架係我其中嘅一部至愛。雖然改裝後擺落架車度未必好顯眼，但總好過冇改。講真個框邊咁幼，磨走中間網的部份時都幾擔心萬一一下唔小心整斷咗，到時就功虧一簣，不過好彩最終都touch wood冇事。
pic 1pic 2

第四日 《九月七日 星期日》：局部打磨車身和車頭蓋，發覺拋光後的地方與原本沒有打磨的地方有很明顯的分別，所以全車再噴多一層光油。之後用筆將整個車殼和車頭蓋內壁油啞黑色(pic 3)。
pic 3

第五日 《九月八日 星期一》：裝上椅、儀錶板、頭尾燈、嵌埋車身和車底。個車型已經出咗o黎，還有死氣喉，擋風玻璃、車頭蓋入風口(原本係網紋實膠但又被我挖空咗，要補番張尼龍網)、倒後鏡等還未裝上。我發覺自己有啲走火入魔，所有有窿的地方如果冇開嘅我都開咗佢，好似軚盤中間三叉的窿位都比我挖空埋(pic 4)。
pic 4

第六日 《九月十日 星期三》：裝將所有氣喉管部件(包括四個死氣喉)噴啞黑色。死氣喉的喉壁太厚，所以之前我將每一個的厚度都磨薄，效果出乎意料嘅好，可以比得上金屬嘅代替品(pic 5)。此外，砌埋所有細微部件和引擎附加零件，已接近完成階段就o黎可以埋洲啦。
pic 5

第六日 《九月十日 星期三》：攪埋啲濕碎零件包括擋風玻璃框、軚盤、波棍、車頭/尾蓋皮帶鎖‧‧‧攪o店，食碗麵！！

總結
開頭都題過呢架係我其中一架最鍾意嘅法拉利型號，所以落咗特別多心機去砌，有好幾處地方都經改裝過，務求睇落去有多啲真實感和滿足感，經改裝過的地方包括鬼面罩、引擎電線及喉管、車頭蓋入風口、車轆、軚盤、死氣喉等。噴油方面都幾滿意。睇多幾睇真係想搵個盒鑲起佢。

Tamiya - 1:24 Jeep Wrangler Open-Top (Diary)

今日打大風，又响屋企摷番舊時砌開未埋尾的爛尾模型，搵到呢盒唔知幾耐之前買落砌到半路「劈」埋一邊嘅絕版Jeep仔。盒模型已經砌了大半，引擎、底盤已砌好，但手工就麻麻地，車殼已髹了橙黃色但未噴光油(pic 1)。唔知點解當初會噴呢隻色呢，而家睇落好似唔係好襯架車，但唔想再花時間重噴，所以有得佢。
pic 1

未完成部份包括車內籠及裙邊顏色、儀表板、椅、輪圈(已清除所有電鍍銀色)、防滾架、泵把和引擎艙內的零細部件。相信噴內籠及車邊顏色會較花時間及挑戰性，要先用膠紙遮蓋着車身又多彎又凸的部份，相信呢個都係促使當初爛尾的原因。

盒模型已經擺了很耐，張水紙亦已風乾打哂殘，表面已龜裂包括兩個儀錶，照睇啲水引紙冇可能用水浸開，唯一的方法就係水引紙連底紙一齊貼，其他的水引紙圖案`就要壯烈犧牲了！

第一日　《八月廿四日　星期日》：先用清潔劑將車身洗淨。話哂擺咗响個盒到咁耐唔多唔少表面都會積聚塵埃或發霉。第一輪光油噴好後，發覺黐住些塵埃，所以要等啲油乾透清除後再噴。

第二日　《八月廿七日　星期三》：今日再噴光油並將車底部份油啞黑色，因為有很多彎位和凹位，用噴的方法未必可以覆蓋到全部，所以我打算用手掃。雖然質素會較用噴的差，但冇所謂啦車底砌好咗之後都睇唔到嘅。

第三日　《八月廿八日　星期四》：準備噴內籠，先用膠紙遮蓋車身淨係露出內籠範圍。然後以啞深灰色作內籠主色，我用郡氏40號 (German Gray)。

另外座位的接駁口很大，要用筆地收補(pic 2)。
pic 2

第四日　《八月廿九日　星期五》：噴完內籠跟着噴車邊，亦是最難用膠紙遮蓋的工序因為車邊有很多彎位和凸位，膠紙唔會黐得很貼尤其是彎凸位部份(pic 3)，所以都係搏一搏咋！個泵應該要教番細啲壓力，如果唔係啲油可能會在膠紙邊滲入車身。
pic 3
pic 4

噴完之後發覺輪拱周圍有滲漏(pic 4)，乾透後要用幼沙紙擦去。

第五日　《八月三十日　星期六》：清除滲漏油漬，用1500號沙紙慢慢將油漬擦去，再用磨光膏將表面磨滑。除此之外打磨座椅、錶板、轆鈴然後噴底灰及上色。乾後將儀錶水印紙連底紙一起貼在儀錶板上。
與此同時，諗緊好唔好將架車整得粗獷啲，將所有鉸位油黑色。經左睇右睇後都係覺得架車得隻黃色太單調，所以去馬將全部鉸位油上半光啞黑色。

第六日　《九月一日　星期一》：執噴油後的手尾，其實都有幾多地方要執，前陣子噴車邊除了有滲漏現象外，邊位有好多都唔係噴得咁好，要大執一輪。

第七日　《九月二日　星期二》：執咗一大輪，架車終於都可以見得吓人，但嚴格來講都仲係有啲瑕疵清除唔到。再整埋其餘的部件，包括倒後鏡、防滾架、泵把等堆尾在望(pic 5)。
pic 5

第八日　《九月三日　星期三》：攪o店，食碗麵！

總結
這盒模型買了好幾年，當初都係壞着三分鍾熱度的衝動買的，可能因為上色太複雜和麻煩，所以砌到半路就冇心機劈埋一邊。事隔幾年後攞番出來都唔係咁想砌，但又唔想繼續擺佢响度，所以襯住自己仲有啲火盡快攪o店佢，如果唔係盒嘢又唔知會封塵封幾耐。

副模型某些地方做得幾精細，但某些地方亦很求其，好似車頭燈冇燈箱只是用一塊銀色膠片頂住，還有有啲接駁位啲虛位好闊，架車砌好後有些少不平衡得三個轆掂到地。而且有很多部份都啤埋一齊好難上色上得靚，所以部車整體上整得麻麻地，好多瑕疵，我亦冇心機去收改吓啲不足處。初初見到架車噴咗橙黃色，好似唔係咁襯，但砌好後又覺得唔錯喎。點都好啦最重要係終於埋到洲，少一盒爛尾模型封塵。有空位擺其他後期嘅新力軍，有排砌！！