Revell – 1:24 Ferrari California (close top)

好耐冇砌過較新款嘅拉利車，對上一次應該係兩年前完成嘅612 Scaglietti，但都己經停產。今次呢盒係幾年前買下的  Calofornia   (關頂)型號，打算都係直砌。唔知點解利華唔學日本模型咁將個頂與車身分開，砌好後就可以選擇開頂或關頂型態。可能係想賺多一筆，如要有齊兩個開、關頂形態就要砌兩架。

與以往砌開的利華模型車一樣車頭蓋都可以開合展示引擎艙內的細節；但也同時車頭蓋永遠都係冚唔埋，呢架尤其嚴重！或許由此可知點解利華唔整分體式車頂！


引擎主體、傅動桿、後輪的差速器砌好後大部份會被遮蓋，所以打算只將露出看到的部份上色，傅動桿砌好後睇唔到，所以可以完全唔使上色。


車底部份依照說明書上色，死氣喉加點氧化效果。



車廂顏色打算用棕褐色，今次嘗試先噴上較深嘅啡色(#7)打底。


然後再用稀釋了淺棕褐色(#44)噴上。結果係雖較淨噴(#44)為深但仍覺得太淺色，下次都係溝好色才噴。地台顏色用Middle Stone (H71)。噴好後雕通兩側的安全帶出口位。


車殼顏色選用拉利的金屬藍色，樽油係幾年前在模型展買的，雖然藍色車身嘅拉利外表睇落去唔夠紅、黃、黑般辣，但呢款拉利唔係走辣跑路線，加上外型有點斯文似女人車，所以用隻較斯文嘅顏色都應該唔錯。


先將車殼內外薄薄地噴一層黑色(#92)打底，內籠及引擎艙的主色是黑色可以噴厚一點。然後才噴底漆。


噴上金屬藍後效果唔錯。


模型沒有提供貼紙噴車窗黑框，但框框的外型有凸線，可以勉強用筆髹。


兩側的車窗打算做開著的狀態，將車門窗和後部份的三角窗分開然後髹上黑框。


轆拎噴上smoke(#101)，攪埋其餘的細節，又完成多一盒。

Tamiya – 1:24 Minolta Toyota 88C-V

繼續完成之前未完成的模型，今次呢盒早在2002年已購入至今有十一年咁耐，盒底的價錢牌是$88，比起今時今日嘅價錢平咗差不多一半！

模型只是砌好引擎部份，其餘車殼的零件已剪哂出來及打磨好。部車車殼外要上兩隻色而內部亦要上黑色，當初見到上色程序咁複雜所以砌好引擎後就冇繼續砌落去。過咗十年多後，張貼紙竟然冇黃到亦冇裂痕好似新買一樣真好彩！

呢盒模型的車門不是連住車身的，網上見到有些模友將架車改成車門可以開合，好型！我曾經都有咁嘅計畫，所以連接著車門前方的車身部份早前都鋸開咗，但可能而家對砌模型已經冇咁高要求，加上早前砌好的引擎部份上色方面唔係砌油得咁好，又冇另加細節，所以都係直砌整得靚靚地就算了！


開始上色，將所有parts洗淨後第一步是噴內壁黑色(#92)。

外殼噴上白色底漆後，先噴白油(GX1)，主要著重噴好白色部份。蓋好白色部份再噴上剩餘的淺藍色部份(#323)。


貼紙黐好，可以噴光油。


轆拎先將整個噴上白色(GX1)。


鎅一塊圓形貼紙蓋上中間白色部份將周邊噴上電鍍銀色(SM06)。隻油雖然話係電鍍銀色，但效果只是比(#8)拎和幼細但未致於有鏡面效果。


輪胎上的貼紙一落筆就唔可以再移位，所以黐得有點核突，在輪胎上薄薄地噴一層稀釋了的黑色tone down番啲字體，然後套上轆拎，一套車轆完成。不過可能貼紙已過了相當日子，有點硬及冇乜附著力，相信過一排貼紙會逐漸脫落。


車頭燈內胆與其髹上銀油，我用錫箔貼紙代替。先用打窿機將錫箔貼紙打四個窿。


將打出來的四個圓形錫箔貼紙黐上頭燈內胆位置，並用棉花捧將它完全貼實。


然後黐上燈罩，效果應該會好過淨係髹銀油。


車殼已噴了光油及拋光。


迫力碟，碟身噴上黑鐵色(#28)；中央噴上銀色(#8)；卡鉗髹上深銀色(自己溝)。


儀錶版的舖排與真車的有點出入，不過都盡量依照番真車儀錶版上的顏色按鈕和燈位上色。


將餘下的parts砌好後又完成多一盒爛尾模型！雖沒有作任何改裝及加料，但整架車的顏色配搭都幾靚。最鐘意萬能達個logo因自己曾擁有過一部萬能達菲林單反，好有親切感。