Tamiya – 1:24 Mitsubishi Pajero ‘92 paris Le Cap Winner & Shunko Decals

繼前陣子的250GTO後又一盒被遺忘的模型，呢盒比之前完成嗰盒更加早買，連說明書都已黃哂！

呢盒模型已經停產咗好耐，而且記憶一路都冇番出過。雖然凋低咗咁耐，但啲件全部响度，加上自己都喜歡舊款劈蔗佬所以一路都唔啥得掉。

車殼原本已黐好貼紙，但可惜光油都未噴就擺埋咗一邊，過咗唔知幾年後攞番出來發覺之前貼好的貼紙已經全部變黃哂，冇偈有清走哂重新上色，但噴好油後又再次擺埋咗！如是者又過咗幾年直到最近發覺之前噴落的白油變得有點暗啞，所以又的起心肝再清洗多次再重新來過！

原裝的貼紙已經用咗，所以入了Shunko Models出嘅代替品，這張貼紙和原本那張有點不同，車尾紅色部份原本是貼紙，但新呢張則要自行上色，但我覺得自己噴會比用貼紙的效果好。新貼紙有埋原本冇嘅樂富門香煙字樣而且還可以選擇貼冠軍車(#211)或亞軍車(#210)。


內籠、引擎、懸掛等早前已經砌好及上了好色，所以唔可以再重新再來，只有車殼可以由零開始。


車殼之前噴落的白油隨著時間變得暗啞及有點微黃。


開始洗油，今次只用一樽模型油份量的開油水去洗，這較過往所用的份量少皆因現今的開油水太貴唔想嘥咁多。用以往嘅式式薯條法洗掉九成以上的舊油，再用棉花沾開油水抹掉殘餘在模型上的油漬。車身的舊油基本上已經清除哂。


開始重新上色，噴上白底漆(之前兩次都冇用底漆打底)後，然後依照說明書內籠先噴橙色(#59 + #1)，車尾蓋內壁噴上半啞黑(#92)。


遮蓋好內籠上好色的部份後，外殼噴上白色(GX-01)，再噴紅色部份(#158)。


初步黐好貼紙，貼紙的質地好厚，但一浸就甩唔使等好耐。車尾較大塊的貼紙貼在不平的表面上貼得唔係咁好露了少少底，但用模型油執執應該問題不大。

噴了光油後略略打磨一下，未砌埋parts前再check吓參考圖片發覺有些地方噴錯色，車尾艙原來全是橙色；兩塊定風翼底部是紅色(其實說明書有指示但睇漏眼)，好彩兩處地方都唔難矯正。

噴車頭黑色部份時，撕遮蓋膠紙時黐甩咗部份米芝蓮貼紙，激氣！

噴好後砌埋其餘parts，車門的玻璃窗框說明書沒指示要上色，但根據參考圖片整個窗框和細窗的滑動軌都應是黑色的。

砌埋其餘parts後，架車基本上已完成，但越野車和坦克車一樣，太過新淨睇落唔係好真實，所以遲些要加點舊化，但未做舊化前先影幾張乾淨相。