Revell - 1:24 Mercedes Benz SLS AMG; Hobby Design Photoetches

第一眼見到呢架SLS AMG就即刻聯想起經典嘅300SL，那對鷗翼式車門；車頭入風口；車側的散氣口;就連車尾燈都與300SL有些相似，然而我都幾喜歡300SL嘅外型。

今次入埋Hobby Design的蝕刻片加強多點細節。呢套蝕刻片都幾齊全，連車廂內中控台上每一粒按鈕都有埋。


前期加工準備

早陣子砌過同時利華出品的拉利612 Scaglietti，車頭蓋同是可以開合，但砌好後冚唔實，有見及此未開始砌前先來個素組，車頭蓋和車門都冚得埋。


開始打通車身上一些密封了的窿窿，首先是引擎艙兩旁。


車頭入風口的網位當然不除不快。


入風口的標誌桿在真車上不是全條電鍍，要刮去後部份的電鍍層。


開始砌偈和底板。偈上八個密封氣口雖然砌好後唔會睇到，但我全都鑽空哂。


偈、波箱及傳動器全都依照說明書指示上色，排氣喉加噴了點透明橙色作氧化效果。


煞車碟換上蝕刻片，效果果然唔同哂！


當開始動手裝輪轂時發覺前右邊那個有缺陷，前下半部份在倒模時居然漏咗(重未見過咁離奇)！我影了張相email去利華反映，初初都唔諗住利華會回覆要自行動手加回唔見咗部份，但出乎意料之外利華有回覆還安排有關部門寄番件parts比我...


趁個零件未到期間繼續砌其他地方。開始上色，第一輪上底漆，主要是車殼和部份內籠。


煞車碟的鮑魚噴上銅色(#10)。


大路的SLS AMG車身都是銀色，我都覺得銀色幾趁架車，但齋銀色好似太單調，所以又噴多隻色。外殼先噴上銀色(#8)然後在中央位置及倒後鏡噴上透明綠色(GX104)。


用膠紙由頭到尾遮蓋兩條間再噴回銀色。撕走膠紙後完成了兩條綠色跑車拉花。


...終於收到利華寄來的配件了，估唔到只是一件小零件利華都會空郵送到，不過就要等成個月有多才收到，係就係耐咗啲，但咁負責任都要比個like佢！



內籠本來想用紅、黑色做內籠，但因應番現時的車身顏色，會改用黑、淺灰雙色。座椅後的儲物袋的蝕刻片有精細的網紋袋，但黑猛猛加咗上去都唔覺眼，所以塞咗本微縮C&D雜誌落去凸顯吓。


發覺車拎又有壞件！不過好彩唔算嚴重而且係內件砌好後睇唔到，唔係又要send去利華等成個月攞配件。


轆拎直接噴上啞黑(XF-1)和半啞黑(#92)，沒有先清除鍍銀層。


完本想等漆油乾後用牙籤括走拎邊的黑油露出番電鍍銀層，然後上一層透明綠來配合番車身顏色，但點知鍍銀層很容易括甩，最後都係要油上銀色再油透明綠。


再素組一次，頗滿意。


車頭蓋和車兩側散氣口網用蝕刻片代替，但氣口上兩氣橫條如用蝕刻片實在太薄唔啱比例，要用番模型的塑膠配件，但要去除網位部份。橫條又幼又易斷好難攪，攪咗相當時間才攪掂哂總共八條橫條。


完成埋其餘細節，又起多一盒！