Hobby Boss - 1:72 Euro Fighter EF-2000B Typhoon

另一盒飛機模型。這是一盒Hobby Boss品牌的模型，以前未砌過呢個牌子的模型。模型總體上零件唔多皆因是一架齋機，沒有任何飛彈或導彈連附加油箱都冇！細節方面一般，panel
line都ok交到貨。

機身上半部的倒模方式和別的模型不同，不是兩邊機身分開倒模而是上下整個倒，這可以省卻時間磨滑中間的駁口；兩片機翼連機底是整塊倒，咁大塊件難免機翼表面某些地方出現收縮凹陷現象。零件與零件之間的夾口相當顯眼尤其是機翼及尾翼與機身之間補土唔少得，當中前機翼與機身之間的駁口好隱閉好難磨！

Testors - 1:24 Ferrari 250 GTO

一「袋」被遺忘的模型，「袋」是因為發現時模型盒已經冇咗只是用膠袋載住。

模型是在網上bid返來的二手模型，想起當時bid嘅目的唔係為咗架車而是想借那副偈移植去另一盒亦是當時在網上bid返來較精細Gunze
Sangyo出嘅250 GTO... 但既然現在摷到呢份模型出來，就即管完成佢唔好嘥，不過副偈就唔會砌住。

盒模型雖掛著Testors牌子，但啲餡其實出自Italeri。模型嘅造工麻麻，panel
lines好闊吓，車頭蓋中間拱起部份亦太誇張，不過志在想完成佢，所以都唔打算執。

先將車鼻下半部和車尾兩側出風口導板黐上，去水口及打磨後先在車廂位置噴上銀色(#8)其餘地方黑色(#92)。車頭蓋亦封埋。


車底和車廂都是分別以黑色(#2, 92)和銀色(#8)作主色。


車身起初本來想噴傳統嘅紅色，但可惜模型的水紙冇咗，所有的拉利logo都冇哂，車兩側的盾牌型拉利logo會是一個問題，加上睇得太多250 GTO都是紅色冇乜特別，所以又來個雙色配搭，以藍作主色中間夾條Y型黃線像圖中這架，幾獨特又多一點跑味，車兩側又冇盾牌型拉利logo，啱哂！


開始上色，先噴上白底漆，紅色車身真係好難用白色底漆完全遮蓋！在中央位置噴上黃色(#4)。

用膠紙遮蓋著黃色線的形狀，然後噴上藍色(#110)。


撕去膠紙後，發覺有藍色渗入了黃色部份，但唔係好嚴重，執一執應該冇問題。隻藍色比我想像中深咗少少，架車令我聯想起宜家國嘅國旗！


張水紙冇咗，唯有用手盡量畫好儀錶版上的細節。


其餘部份只是依照說明書上色及裝嵌，算是草草地完成！

Tamiya - 1:24 Alfa Romeo Giulia Sprint GTA (re-paint)

忽然挑起條筋想翻新一吓完成咗好耐嘅舊模型。呢架愛快係當初開始學用噴筆噴車殼時整嘅，車殼冇用底漆只是噴了紅油和光油，所以啲顏色睇落去有啲透冇乜實質感，就好似淨係噴了光油落個膠殼咁，所以今次翻新淨係會噴番好個車殼和車廂地台，其餘都唔會再攪。


開始拆骨，大部份零件都拆得甩，但後窗玻璃因一時大力過頭整裂咗，激氣！但已經騎虎難下冇得返轉頭！


車廂的手制和波棍都拆唔甩唯有用膠紙包住。整個車殼用1500號沙紙濕磨後，車身的貼紙用膠紙遮蓋好，希望可以保存得到。


先用灰底漆略略遮蓋紅色底色，再用白底漆完全遮蓋紅底色。


車頭蓋想整條愛快標誌嘅蛇仔圖案，在網上download咗條蛇仔圖案，裁好後貼在車頭蓋噴油(翻看說明書原來貼紙原本有呢條蛇仔但當時冇貼到)。先在車頭蓋噴上白色(#316)呢隻白色冇1號仔咁白，噴完之後趁忡有油剰，索性將整個車殼都薄薄地噴一層。


全車先噴一層淺粉紅色(#112)才噴紅色(#158)，發覺有層粉紅色打底隻紅色鮮艷過直接噴紅色。


撕開紙模後，蛇仔圖案啲邊位有少少紅色滲入要執一執。為加多一點點跑味車頭部份改成白色，車頭、尾及車門都噴上賽車用的編號位。


噴好光油後開始重組，在車廂內搭了個防滾架。


車殼拋完光後，油番窗框的電鍍，銀油是Testors出品，隻油用筆油都幾令吓效果好過隻8號仔，不過油咗後就盡量唔好掂否則指模會食咗落啲油到。砌番埋所有零件後，頭尾燈交叉貼上膠紙増強賽車感，嗱嗱聲再完成多一盒。