Tamiya - 1:24 Porsche Turbo RSR Type 934 Jägermeister

細個嘅時候好想擁有一盒孖星嘅1:12波子934 Jägermeister大比例模型，但那時的價錢實在太貴負擔唔起，如果買咗肯定會比呀爸呀媽鬧死。幾年前孖星曾返出過復刻版但價錢仍是好貴，最後始終都係得個想字。

當知道孖星會出較細的1:24版本時十分之期待，盒模型本來四月初就已經出咗，但可能那時咁啱遇著班貨櫃碼頭工人罷工，冇人卸貨所以延遲到過咗四月中打後先响模型舖搵到！

當然我唔期望呢盒1:24會好似1:12嗰盒咁精細和咁多嘢砌。結果係呢盒1:24簡單到只得個殼和內籠(curbside)連偈都冇得砌，雖然係冇乜期望，但都有點失望！唯一值得安慰嘅係盒模型有蝕刻片，所有網位都唔係實心嘅。此外，發覺車轆"Dunlop"及汽油"Shell"贊助商的logo貼紙全部欠奉！真係比孖星玩死！！淨係得呢兩個logo冇咗都唔知會唔會有廠會出番！

Tamiya - 1:48 U.S. Navy Brewster F2A-2 Buffalo

趁有幾日假完成一些之前砌落未砌完的模型，check吓紀錄呢盒已買了十年有多！這是自己第一盒螺旋槳式的戰機模型，當時砌吓砌吓發覺興趣不大，所以凋低咗。

模型只完成了機身和機翼部份組合和上了銀色，但漆油噴得好薄而且沒有用底漆所以表面質感麻麻，會清除哂所有舊漆重新噴過。貼紙看來沒有出現龜裂現象，只有少許變黃但不算嚴重。摩打係後加嘅，但現在已冇乜興趣安裝，只是直砌快快趣趣完成它算了。


開始動手處理之前噴落的銀油，先用牙膏牙刷擦走表面部份油漆，再用開油水抹走殘餘油漬。搵過一些參考圖片，發覺機翼部件和機身之間是沒有駁口，要在未噴底漆之前預先處理好。


之前未有為機內艙及儀器上色，現在兩邊機身已黐埋上色實在有啲雕轉！


噴了底漆後，主機翼噴上橙黃色(#58)；尾翼噴上普通黃色(#4)但可能被灰色底漆影響，隻黃色滲有灰底漆的感覺，稍後會再加以處理。


尾翼再加噴了另一隻黃色(之前用來噴拉利F430那隻)，但仍覺有暗暗灰灰的感覺。最後都係頂唔順要噴番白底漆再噴黃色才覺得順眼，懶一吓都唔得！機翼近機身處噴上啞黑(#33)；機身藍色部份雖有貼紙提供，但直接噴上藍色(#110)亦不是太困難。


來到噴主色──銀色，先把非銀色部份包好。


今次採用郡氏Metalizer的Aluminium (#218)希望可以帶出到機身金屬經打磨過後的半反光效果。未噴銀色前先噴一層黑色(#2)作底色。


除去所有膠紙後，覺得這隻銀色的確比八號仔令，但又未去到半反光嘅程度。


來到黐貼紙，原來比張貼紙呃咗以為冇事，點知一浸啲裂紋就出哂來！唉，又要花時間做併圖！不過好彩龜裂的情況唔算嚴重，落啲軟化劑(micro set)後問題不大有驚無險地完成哂，但仍有幾個貼紙要略執一執。


將機轆略略磨平一點來凸顯給飛機重量壓着的模樣。


機身薄薄地噴一層半光澤透明油(#181)保護吓啲貼紙，架機大致完成了七七八八，剩下機艙蓋和機底的透明部件還未處理...


機艙蓋和機底的透明部件要油密密麻麻嘅窗框，我未有頭緒點油所以才留到最後處理。部件上的窗框紋又幼又唔多顯眼，根本冇可能白手油又唔出界，模型又冇提供窗框形狀的遮蓋膠紙，真係無從入手！最後都係用翻原始嘅辦法慢慢黐膠紙！啲窗框又密又難看到，真係黐到眼都盲！！


經過過唔知幾耐後終於油好哂！雖然油得麻麻，但已經盡哂力油得唔好都要收貨！


攪埋其餘細節，這是今年第二件完成品。

最後燒熔及拉長一截模型支架做出兩條纜索由尾翼拉到機翼和機身。正式完成！