Revell - 1:24 Ferrari 612 Scaglietti

一盒爛尾模型。這盒係零六年入嘅但已忘記幾時開始砌，外殼和偈都上好哂色；轆拎亦浸甩了電鍍。爛尾嘅原因相信係塊車頭冚裝咗上去後冚唔實彈起咗，諗唔到辦法解決之下，盒模型就咁擺低咗。

車殼的藍色是用郡氏的舊青色(#6)加入適量的銀色(#8)混合而成。


暫且唔理車頭冚嘅問題，先將所有未上色的parts上色。內籠和轆拎先上底漆，內籠然後噴上啡色，隻啡色係N年前自行調教專用來噴拉利內籠嘅啡色，色澤較郡氏的#44 Tan深，幾接近拉利嘅顏色，但啲油已用得七七八八，又唔記得用咩色溝出來，所以用完就冇。噴完啡色後，遮蓋啡色部份噴啞黑色，但啲底漆食唔實，一搣膠紙部份啡油連底漆一併撕甩，激死！好彩甩油的地方大部份都是啲隱閉的地方組合好後應該見唔到，見到嘅地方就唯有用筆執漏。唔知係唔係我稀釋啲底漆時落多咗開油水所以食唔夠實呢？


執好哂所有甩漏後，內籠大致完成。


大部份其他parts都已上哂色，只是將所有化零為整，終於勉勉強強可當係今年完成的第八盒模型。

Check番記錄，呢盒模型買和完成都是同一個月和日，但兩者就相距六年之久！

Bronco - 1:350 Russian Akula II Class Attack Submarine

來一盒從未砌過的潛艇模型。盒模型雖然好少零件，但船身大部份都是一體冇乜駁口，所以預料要花相當時間去除零件與零件之間的駁口。


在未完全夾埋下半部兩邊的艇身前要先裝上尾部的掌舵和推進器軸。中間長長的駁口我用了AA膠作強化及填補，打磨過後駁口算是平滑。


依照說明書，底部應該要鑽開兩個窿來隱固在底座支架上，但我唔想鑽穿艇底，所以除去支架上用來固定潛艇的支持點，將一個空油樽放入艇身內部中央加重重量，完成後就咁擺上去，唔大力踫應該冇事。



潛艇最前頭發射魚雷的出口位於上下半截之間，為免在磨平駁口時會一併磨走埋出口位的界線，要預先加深所有出口的外框，然後才將上下半截黐埋，尾部上、左、右三組方向舵和潛艇身都是一體的，所以也要預先黐上和去駁口。又是一輪AA膠填填補補和打磨。噴上底漆後發覺唔到有明顯的駁口位，但可惜推進器軸已不小心整斷咗！


進行上色工序。潛艇下半部應是艦底紅色(#29)，但我冇呢隻色(加上覺得郡氏隻艦底紅唔係咁啱)再加上唔想特登買一樽淨係噴一少部份(油價貴)，所以我用番早排用來噴巴士用剩的那隻深紅色russet(#81)，但那隻紅色用來噴艦底好似太過鮮色，所以先將整架噴上German grey (#40)，然後再噴紅色從而tone down番少少隻色。因兩隻油一隻啞面、一隻光面，黐好貼紙後要落多層啞光油使它們的反光度一致。


水貼紙雖然不多，但都花了不少時間貼，皆因中間由頭到尾的白線要好有耐性才貼得畢直。隨後在上層啞色透明油保護啲貼紙，主體算是完成。


艇身其餘的細節，首先是推進器油上titanium gold (X-31)，其餘則噴上與艦身一樣的深灰色。頂部一條條的探測器依照說明書上色。


潛艇本身已經完成，接着是為底座上色。首先是塗上金屬名牌上的字。最後底座噴上傳統的顏色黑色(#2)，兩顆支撐點金色(#9)。


完成今年第七件模型。第一次砌潛艇模型結果自己覺得幾滿意，啲駁口位補得幾好，但就嫌盒模型太過簡單和冇乜可優化的地方。