Revell - 1:24 London Bus (Part 1)

呢盒模型雖然係1:24，但係個盒和重量都十分之夠份量。打開盒啲parts塞到「塔塔陷」，擺錯位置都唔冚得實個蓋。網上有很多倫敦巴士的資料和圖片，我亦下載了很多車外車內的圖片作參考，有些外國模友更已經開始或完成咗，我亦在從中偷吓師。

呢款倫敦巴士的正確名稱是AEC Routemaster (或Routemaster)，已經行走了倫敦及其他倫敦近郊地區及城市達四十幾五十年之久，近排才被全新較環保的新型號全面取締。 不同的地區有不同的需要和規例，從而衍生了不同版本的Routemaster。最常見行走倫敦市內的紅色巴士是屬於RM標準版和RML加長版，它們的共同特徵是上落位於車尾和沒有門閘，而這盒模型是屬於RML版本，分野是車身中間多咗半個窗，從而車廂上下層共多了四張孖座八個座位，個人覺得RM標準版外型好睇啲。


初初覺得有點老鼠拉龜唔知從邊部份開始砌先，雖然說明書有步驟，但要兼顧上色方便和其他自製細節又唔可以跟足說明書砌，唯有一路砌、一路諗...

車頭外殼是獨立一個支架，所以首先攪攪個車頭，將駕駛艙前其中一個通風口改成打開狀態及鋸走車牌，車牌會移至車頭網的下前端。


車頭的實心網我見過十個模友有九個都將它去掉，換上金屬或尼龍網。我亦唔例外因為它的位置太顯眼亦很礙眼，不除不快。取而代之是蝕刻金屬網(Studio 27出品)，但塊網另有其他用途，所以暫時未裁出來。


引擎 (Steps 1 - 4)

車頭部份改裝大致完成後，跟住是砌副偈，模型提供了兩款引擎選擇，和大部份模友一樣，我選擇砌較舊的利蘭偈因大部份參考圖片都是這副偈，所以有好多發揮空間(可以改做或加多點細節)。從參考圖片發覺引擎表面很粗糙，沒有細緻打磨過，就好似早排砌坦克車車身的表面，所以用番同樣方法塗底漆，用筆塗上Mr Surface 500，再用半乾的筆頭在表面亂篤做出不平滑的表面，然後才噴上銀油。

引擎前端倒模出來的皮帶做得太厚，睇落唔係好順眼所以將所有去掉，然後用油了啞黑色的遮蓋膠紙代替。雖然砌好後皮帶可能唔係點見得到，純粹係自己嘅喜好。


加入引擎的電線喉管，雖然從參考圖片中喉管全都被油上銀色，但其實喉管是銅製所以塗上銅色，引擎亦唔會淨係銀色咁單調。加埋一些改做和細節，副偈算是完成。



駕駛室(Steps 20 - 26)

駕駛艙四邊、地台和上蓋是與車外殼分隔開的。先攪張司機椅，雖然模型有提供了與乘客座位一樣絲絨花紋的水紙給司機椅，但我覺得司機椅應該是簡單的黑色人造皮而不是絲絨。將座椅的人造皮部份貼上遮蓋膠紙然後油上啞黑色，遮蓋膠紙的表面可營造到皮革表面的效果。座椅架用筆塗上光黑色，椅背再自行加塊膠片遮住。


在駕駛艙四周(尤其是地下)會做甩青，在甩青的地方先噴上銀色，部份地下舖設有格仔紋的防滑鋼板，我將用作車頭鬼面罩的金屬網遮住再用稀釋了的啞黑色噴出格仔紋效果，再將部份格仔紋擦掉造出因長期踐踏道致磨蝕的效果。


駕駛艙的顏色唔係架架巴士都一樣，有紅黑、有啡黑也有全黑，我就較喜歡啡色襯黑因睇落較舊和樸素，而且又較凸顯到駕駛艙內舊化的細節，再加些少污漬和甩青效果會唔錯。

啡色部份是用筆塗上凸顯出不平滑和手掃紋的表面，塗好後做點污漬舊化和甩青然後先將四邊黐埋。


地台方面將所有parts都做舊化。


駕駛艙上蓋亦加了點細節，純粹是照參考圖片造，我唔知係乜！


車底 (Steps 10 - 13)

車底只造了一半的細節，因欠缺參考圖片所以唔會花時間去加工改造。假組一次後所有零件接駁位都冇問題。唯一覺得唔妥嘅係前轆的轉向幅度好細，而且左右幅度都唔對稱。


改善轉向幅度，將轉向軸的周圍擴闊。

改做後前輪的轉向幅度大咗啲。


車底除了平面部份外，其餘都噴上burnt iron (#61)，某些地方還噴上steel (#28)來營造氧化效果。平面部份則噴上啞黑色 (#33)。


散熱器 (Step 14)

車頭的散熱器在真車上只佔整個入風口的大半，而模型則佔了整個入風口，好明顯係太大要做點修改。


將散熱器一分為二，然後再加點修飾。


散熱器嘅尺碼大概和真車的差不多了。


待續...

相關網誌：
Revell - 1:24 London Bus (Part 2)