Tamiya - 1:24 Lotus Super 7 Series II

另一盒爛尾，三年幾前有位朋友想學砌模型車，所以我就揀了這盒較簡單嘅給他試試，但朋友沒有任何上色工具，所以我答應為架車上色，他只要將上好色的parts組合埋就得。基於架車係佢嘅，用甚麼顏色和圖案都是由他決定，我只是照柯打上色。但上好色後條友竟然話冇興趣砌，冇打算接收架車之餘還叫我幫他埋尾...！我沒有應承，所以架車入了冷宮。過咗幾年後我唔想架車繼續阻住我的地方所以只好屈服，而家攞番架車出來看覺得啲顏色幾「獨特」！車身顏色朋友揀了碌卡時那張淺黃色底紙的顏色，因沒有現成唯有自己調教，用白色作基本色逐少加入黃色，直至接近那隻淺黃色為止。車座椅方面仲騎呢，要一張紅、一張藍，椅背上還要噴上男女廁所的工仔圖案，真係冇眼睇！在種種的要求下，成架車就變了這個模樣，好唔好睇就真係見仁見智！但我就唔打算將它重噴因始終都是朋友嘅，我只是將它砌好送去就算了！


和朋友題起話會幫他完成架車，佢連聲唔該之餘還想要求在車頭蓋上加多三條紅、白、藍間條，真係吹脹！但既然應承幫佢攪掂，唯有再幫埋佢呢次！用膠紙貼好間條的闊度，再逐條逐條用筆油上，油好後又覺得幾OK喎，起碼冇咁單調。

噴好光油及拋光後將所有預先上好色的parts組合埋完成，又起多一架...之餘又多咁啲位！

Dragon - 1:35 Commando Hum-V

來到2012年清理門戶嘅第三回。呢架又係N年前買落砌吓砌吓冇耐性掉低咗，N年後攞番出來完成。好奇怪個盒明明係Shanghai Dragon的品牌，但說明書和水貼紙卻印有Italeri字樣。不過大陸嘢乜都有可能... 某日行過模型舖發現Italeri出品的同一款模型...盒面都係照抄過來，真係有袓國特色啦！

之前砌落淨係完成咗大部份個底架，好彩咁耐以來都冇動過盒模型，所有parts都响度，但張水紙就應該凍過水貼唔到！

一向都冇砌開1:35的軍事模型，這盒買來最主要係因為鍾意架Humvee大水牛，但1:24又唔出唯有整架1:35頂吓癮！

開始組合車身，車身兩側和車頭是分開搗模，但驚啲夾口唔係咁夾所以預先黐埋才噴油，所有夾口都唔係好偏離得好離譜。


噴好底漆後再噴上軍綠色，隻色係混合咗兩種軍綠色── 主色為(#38)加少訐(#15)。

隔了咁多年已經唔睇好張水紙仲可以貼得到，周邊的透明部份亦已經黃咗，但既然仲响度就唔好嘥不妨一試，至多將所有圖案飛哂邊，浸咗落水一陣後神奇地啲圖案居然冇散到，貼好後加啲軟化劑後啲邊邊都係飛起咗黐唔實，可能耐得滯啲膠水冇哂，我用些少消光透明油補補啲邊位再噴層消光透明油，勉強可以收貨！

呢架係軍車，車外車內都係同一隻顏色(啞綠色)，又唔使噴光油和拋光，慳水慳力。雖然可以噴吓迷彩，但我只想快快趣趣完成佢，所以淨係上了單色亦冇做舊化。2012過了三個月，可以話勉勉強強算完成了三盒模型啦！