Doyusha - 1:43 Ford GT

有日响網上見到童記出咗四款1:43嘅車仔模型，其中還有林寶的Reventón，但等咗好耐都未見到模型舖有得賣(但而家新記已有得賣)，所以唯有在網上買，一口氣買咗兩盒Reventón和Ford GT，因兩款車都沒有出過較大比例的模型。連郵費買兩盒每盒平均唔使一嚿，都算OK啦。
過往未砌過童記嘅模型，但睇落兩盒模型啲質素和比例都唔差，但當然唔可以和手辦模型比。咁細比例和咁嘅價錢自然唔會有咩要求，但所有睇到嘅細節都有哂，都算唔錯。
今次先攪架Ford GT，零件和工序都很簡單，先來素組車殼，覺得車轆好似大咗啲有點似火柴盒車，但車殼整體比例尚算準確。

素組後接着是偷薄parts的邊位。

全車先噴上白底漆，噴1:43的車車真係摼好多油。車身本來打算噴六十年代Gulf車隊的顏色(淺藍+橙)，但找不到Gulf標誌的水紙，所以唯有擱置用回單一顏色車身。黃色車身雖然搶眼但頗為普通，因此改用淺綠色...冇錯，就是噴370Z那隻綠色，配合中間兩條黑色拉花相信應該唔錯。


正想貼拉花之際，發覺拉花的邊邊唔係印得咁靚，因此決定不要水紙自己噴，既然係自己噴就唔想噴番和水紙一樣的顏色，而選擇了銀色。用膠紙由頭到尾貼出兩條間的位置和闊度，遮蓋好其餘綠色部份然後將兩條間噴上銀油(#159)。噴好後撕開膠紙覺得效果唔錯，雖然冇黑色咁顯眼。

噴完頭頂的拉花後來到車身兩側的拉花，一樣是兩條間但較車頂幼，兩條間之間的距離也較窄，又要預留出一個空位畫上FORD GT字樣。

貼好哂膠紙後噴上銀油，撕開膠紙後貼上FORD GT字樣水貼，然後用銀油遮蓋，因字體細要用手油，效果麻麻。

內籠方面，跟真車一樣主要是黑和銀色，內籠細節做得唔錯上色亦唔難，但可惜冇提供到速度錶等的水貼，錶位位置空空如也，但砌好後應該唔係好覺眼要用放大鏡才看到，所以冇再攪。


副偈係倒模式，表面細節略兼太簡單。

所有轆拎和逼力碟都要浸開油水甩電鍍漆，但忘記攞番出來，啲件足足浸了兩日，啲電鍍漆係浸甩咗，但連啲膠都乸到軟軟地，逼力碟上啲窿窿都差不多冇哂，真激氣！唯有擺佢幾日等啲膠硬番。之後將啲轆噴上底漆及銀油。

砌埋其餘啲parts之後，完成一一年第二件作品，但手工就麻麻地。

Tamiya - 1:20 Ferrari F189 (Early Version) w/ Museum Collection decals (part 1 of 2)

二月中報了一個course，上堂之餘又要做功課，攪到冇乜時間和心情砌模型，連三月中有個齊齊砌聚會因臨時要趕project都去唔到，錯過了很多精彩的傑作！一一年已差不多過咗一半但只係完成咗一盒模型，而且還是上年砌落嘅，實在強差人意！而家個course已經讀完了終於可以抽番啲時間出來砌模型啦！九月又有另一個聚會，主題是F1賽車，今次唔可以再錯過啦！



為配合主題，摷吓有冇咩未砌或未砌完的F1賽車模型，發現都有好幾盒，但未有衝動去完成那些砌開未埋尾嘅模型，所以決定開盒新嘅。這盒模型記憶中是早幾年有位朋友唔要，原因係張水紙唔見咗，我見盒模型係全新嘅好好哋冇乜唔妥，基於砌得唔好嘥的理念就替朋友哽咗佢。前年執拾模型時見到呢盒模型差咁張水紙，所以在網上補買番張，但價錢和買盒全新嘅差不多，不過呢款屬前期型好似冇返出過。

這架是拉利八九年F1車。想當年文素是拼命三郎，但奈何架車嘅表現始終差麥拿倫少少，所以有好多場都無功而還！相反麥拿倫車隊的冼拿和布魯斯想爭做一哥場場都鬥到你死我活，令到整個賽季場場都十分精彩剌激。

呢架車有廿多年歷史，車身線條很簡單，一睇就知係邊個型號，沒有像現今的F1車三尖八角般複雜設計，而且望落去架架都大同小異睇完都留不到咩印象。

前期準備
模型整體構造上很簡單零件亦不多，所以想加多少少內部的細節... 開始開工，這盒陳年模型零件當然及不上現今的造工，第一件覺得最唔妥嘅就係和座椅一起倒模出來的安全帶，非磨走不可，磨走後不打算將表面磨滑因真椅相信係用玻璃纖維之類的物料做，表面也不是很光滑。


車身方面，從參考圖片中發覺前轆部份的車身(黃圈)應該是一整塊，但模型就分開倒模完成後會留有駁口，但假如先將兩塊預先黐埋去駁口，車輪搖臂又裝不上...不過最後都係決定黐埋先，點樣連接搖臂遲啲再想辦法。車身尾部兩側的車身也與前兩側的車身一併黐上，車鼻部份則與主體分開。


下一部是進行車身駁口改裝。因車鼻部份切開咗，車鼻和主體之間的橫切面要補加點細節，先用膠片封住再慢慢磨出適當形狀。

駕駛艙後的入風口部件是與車身一體的，所以要預先黐埋去駁口，未黐埋前先油好車殼裏面的顏色(啞黑)，因黐埋後不會油得到。


跟住要攪攪兩梳蕉，倒模出來的死氣喉係一餅餅的，所以要將它化整為零。


原本不打算擺車手公仔，但諗諗吓既然已比埋又有水貼，無謂嘥咗佢，而且砌咗後鍾意可以擺落架車度，唔鐘意又可以攞番出來擺番張吉椅落去。車手是脚重頭輕，齋擺落去架車度公仔會聚向前背部不能貼實背板，因此在未黐埋頭盔前先塞幾粒鐵珠用寶寶貼固定。之後為車手植入頸椎等他可以完成後能夠兩頭拎望住鏡頭影相。

上色

首先先為公仔上色，架車打算整文素那架27號車，但其實兩個車手的戰衣都是一樣，只是頭盔有分別。根據資料圖片，整件戰衣連手套都是鮮紅色，安全帶是黑色，座椅則是淺啡色；顏料方面則分別用上鮮紅(#79)，啞黑(#33)和淺啡(#44)，但其中紅和淺啡兩隻油不是啞色油，所以塗好後要噴多層啞色透明油(#30)消光。


跟着將所有車殼，擾流零件和頭盔上底漆。


終於來到黐貼紙的步驟，這份水紙是Museum Collection出品，它與其他的水紙有啲唔同，除了底紙外，水紙圖案表面還有一層薄膠遮住，要先用水浸甩底紙貼上適當位置，待乾後再將表面的膠紙撕走，好處是貼紙夠薄和不需要飛邊；不好處就是若貼紙離開了表層的膠紙後就像風化了般── 碎哂，然而表層膠紙唔係咁柔軟，若貼在彎曲的表面是很難貼得貼服，我就係衰咗响頭盔上的貼紙，只係淨番個香煙標誌黐得穩，但偏離了正確位置！暫且放棄頭盔轉去貼擾流件，因沒有彎曲表面，所以很順利貼好。待乾後再噴層半啞光油(#181)作保護。

八九年拉利F1車的紅色好似沒有像現時的F1車的那般鮮艷，而且還沈色過現時一般拉利街車的紅色，但可惜沒有參考色版不知怎樣調教，所以只好選擇了一隻較深的紅色(#327)碰碰運氣，噴出來的效果幾合心水。


下一步黐車身貼紙，貼紙的哂士唔係太大沒有難度，但仍有一兩個黐得唔係幾滿意，因為呢隻水紙黐咗落去印乾水後就冇得再改正，所以有一兩個貼紙貼好後覺得位置唔係好正確但已無法更正！

前轆避震搖臂
搖臂噴上半啞黑(#92)和車身噴上光油及打磨後來到要動腦筋的工序，因車頭兩側的車身零件已預先黐上，搖臂無法依照說明書般裝勘，要將搖臂切割開才可以裝上，但怎樣切割才是最佳方法呢？搖臂很幼切割面又細，就算切割後用AA膠黐番埋都唔會好“受力”。在苦無對策的情況下，唯有摸着石頭過河！首先用膠片固定前後端的中心連接點，然後將所有搖臂鋸斷，安放好中間的連接部件後將所有搖臂歸位，再狂落AA膠來固定在適當的角度和位置，但角度和位置正不正確要遲些裝上車輪才知道。

待續...

之後製作及完成：

Tamiya - 1:20 Ferrari F189 (Early Version) (Part II) w/ SMS seatbelt harness