呢架430係第二次砌，不過今次係幫朋友砌來送比佢老闆嘅，是關佢老闆近排買咗架黃色同型號1:1比例嘅玩具。呢盒細廿四倍嘅預計出年一月當佢老闆生日時交車，雖然臨起貨日期還有一段日子，但趁着現在有些少空閒時間，拿拿臨攪掂佢，廢事到時臨交貨時冇時間砌撻Q。上一次砌嘅時候加入了Crazy Modeller嘅蝦片覺得效果唔錯，全部網件齊全唔再講，仲有埋由六塊蝦片組成嘅四隻迫力碟，非常精細(雖然裝了轆後唔係點睇到隻碟)，全套加埋都唔使一嚿水，簡直超值。
.JPG)
今次朋友雖然冇要求要加入蝦片，但在打磨車殼時自己都頂唔順啲倒模出來的實心網，所以把心一橫全部都挖空哂。遲啲入套蝦片補上。
裙腳和前泵把兩側的出風口預先黐上，將出風口配件的駁口磨走。
車身先噴上灰底漆切底地遮蓋紅色底色，打磨過後再噴上白底漆。
車底和內籠全是黑色，車底及引擎艙選用半啞黑(#92)；內籠則選用啞黑(#33)。
內籠用了全黑，砌好後會好難睇到車廂內的細節，所以為架車開開窗。上一架只開了司機位那邊窗，今次索性兩邊都開哂。
車殼今次會噴上黃色，但略兼郡氏隻黃色(#4)太淺色所以加了幾滴紅色(#108)，但上了色後發覺隻黃色又好似深了少少，可能滴多咗一兩滴紅色油。
冇偈砌，唯有在副偈表面上做功夫。副偈的Cam蓋形狀，真車很圓滑，但模型就較起角，所以要用銼將起角邊邊磨圓。
上了底漆後Cam蓋先噴上鮮紅色(#22)，但Cam蓋是粗糙不反光表面，噴上紅色後再加層啞光油(#30)。駁喉部份則油上指定顏色，為增強視覺效果，喉索用電鍍膠紙黐上。
整個Cam蓋上好色，引擎艙看得到的地方都盡量上色和拉了看得到的線。滅聲鼓也用電鍍膠紙遮蓋着增強視覺效果。
整架車要砌或油嘅都已經做哂，唯獨是還未買到蝦片(因為Crazy Modeller已停產，可能要入其他牌子蝦片代替)，剩餘的工序要「篙」住，包括噴光油。
