Revell - 1:72 Eurocopter SA365 Dauphin 2

砌得車車多悶悶地砌吓飛機，大比例嘅驚砌唔掂，先來架1:72嘅直昇機。咁細比例加上唔係日本貨預咗好多細節都唔會有而且夾口都會差啲，參考咗啲真機圖片後，發覺機身鋼板的夾口位和柳釘都完全欠奉，反而多咗度有窗嘅機門。但諗住直砌加上自己唔在行砌機，所以都冇乜所謂。

首先組合機艙的地台及控制台，這組件要和機身一拼組合，地台和機艙內壁噴上啞淺灰色(#36)；控制台則噴上啞深灰色(#40)。


因機艙在組合兩邊機身時便要裝上，當噴機身的顏色時要將整個機艙遮蓋住，機艙座位可以等到完成機身顏色後才黐上，機艙的窗位用膠紙封住。

組合機頂引擎艙及機身，跟着打磨中間條駁口線。因我不想機轆外露，所以將後轆冚預先黐上，但模型本身沒有提供前轆冚，可能要自行製造。


完成好打磨工序後可以噴白色底漆。噴好後上鮮紅色，尾鏍旋扇葉框部份是白色，在噴紅色前先剪兩個相若的圓貼紙蓋住。


機頂引擎艙和鏍旋槳噴上白色。


開始黐水紙。一開始就已經發覺水紙印錯，機尾白色間應是由右至左傾斜藍線靠機尾，但水紙卻是由左至右。唯有將藍線分開貼。


攪咗一輪，終於黐哂水紙，但白色部份太薄透哂底！


根據參考圖片，鏍旋槳面應是黑白間，槳末端是橙黃色；鏍旋槳底面全黑色。


油埋玻璃上的框框和其他配件，第一架飛機模型算是草草地完成。窗與窗之間有啲夾口唔係咁夾加上手工麻麻，有很大進步空間。







相關網誌：Fujimi - 1:72 Westland SeaKing "Flying Tiger"

Tamiya - 1:24 Volkswagen 1300 Beetle 1966 Model (restoration)

某日响發現台看到有個節目將一架殘舊二手嘅六十年代甲蟲車，翻新到成架好似啱啱出廠咁新淨，我忽發其想我都好似有部哂士細24倍嘅殘舊甲蟲車。於是興之所致又去學節目咁翻新吓部自己好多年前砌落嘅甲蟲車。呢架甲蟲係早期作品大大話話都砌咗十年有多，表面有些地方已起了一點點黃啡色的霉，但我當係天然舊化，所以一直都冇理佢，但睇咗個節目後有點衝動想將它大翻新。


那時仲係喜歡用郡氏水性油，但郡氏嘅水性光油噴咗落去後永遠掂落去都係黐手，又留指模兼易黐塵。所以呢架我冇落光油亦冇拋光，但表面亦算噴得幾好，雖然唔算光滑，但冇拋光過嘅車身反而睇落去會有點舊嘅感覺。


舊甲蟲已經砌過三架，呢架係首架，其餘兩架都係砌來送比人，一架也是差不多同一隻淺藍色，但用了油性油及光油；另外一架係粉綠色。但我覺得這隻淺藍色較討好及古典。


今次大翻新係想將它變回新淨，所以唔會唔落光油和唔拋光。臨拆骨之前先來兩張相留念，隱約看到車門對落和車頂有啲啡黃色嘅霉。


拆件過程出奇地順利，幾乎每件parts都拆得甩，可能係啲模型膠水已硬化哂，大力少少就搣得甩。架車有很多細微parts，先保存好那些不需要翻噴的parts。


又開始用過往用開嘅式式薯條洗油法(咁啱麥記而家又有式式薯條食)，用一樽底漆樽容量嘅開油水搗入保鮮袋，然後逐一將每件parts洗淨還原。


洗完車殼後發覺部份車頭、中央和車尾都被開油水乸到裂開咗，好彩唔係太嚴重，用膠水和AA膠黐番及略加打磨應該冇問題。洗完之後，九成九嘅油都洗甩哂，唯獨隙位的油洗唔到，但相信新噴嘅底漆可以遮蓋到啲舊油漬。


等了一日讓洗過油的parts乾番和硬番後可以上底漆。雖然覺得原本隻淺藍色幾好睇，但唔想又噴番同一隻顏色，我打算噴隻較沈的顏色，所以用了灰色底漆。


車身的顏色已敲定，又是玩雙色，今次以淺灰色(#325)配深灰藍色(#72)，車身兩旁噴淺灰，其餘部份噴灰藍，其實只是想趁機會用咗兩隻好少用到的顏色油，放且隻色幾切合中古車的顏色。內籠方面也是同兩隻顏色配搭。雖然兩隻色都話係半光啞漆，但噴了出來的效果卻是全啞面，唔知係唔係同空氣濕度問題有關？但噴了光油後兩隻色都好似同未噴前有啲唔同。


看過一些參考圖片，舊時很多車胎邊邊都是白色的，睇落去幾有古典味，有見及此自己又嘗試將車胎邊噴白。先界個和車胎相若嘅圓形紙圈，逐一蓋住車胎噴上白底漆，乾後再噴層啞色光油作保護。


所有番噴的parts都攪掂，可以開始重組。


重組過程中想加啲細節，先在個distribbutor鑽窿再剪五條幼電線作火咀線。


用紅色線可以突出啲。


內裝已攪得七七八八，都幾滿意新噴隻色。


拋光完成，黐番埋其餘啲parts後，又完成番新另一架車車啦！睇番啲相，覺得今次噴這隻顏色配搭加埋白色車胎較似六十年代嘅甲蟲車；之前淺藍色嗰隻較似七十年代多啲，總知各有各特色，兩種顏色都趁甲蟲車。


因相機鏡頭入咗廠，遲些才可以補番啲大相...！
可以補番啲大相啦！