Tamiya - 1:24 Nissan Fairlady 370Z

啱啱用咗幾個月起咗一架做了些少改裝嘅車車(雖然係砌吓停吓嗰隻)，暫時唔想花太多時間去再做改裝，加上今年唔係起咗咁多貨，要爽手啲。既然要怏，最好就係直砌，但直砌還直砌，都唔可以太馬虎。
呢架最新的淑女型號模型係舊年買的，見佢個外型幾靚仔，又唔難砌，所以決定郁佢！用色方面，潮流興啞色車身，前陣子响網上見到拉利展出咗一架用599 GTB發展出來嘅混能概念車，覺得它的顏色配搭幾特別。呢架車嘅外型又有一兩分似，所以也試吓類似的顏色配搭。


首先係自行調教隻綠色，本來有個主意想搵隻差不多顏色的指甲油試吓，好尷尬地一條麻甩佬响莎X和卓X同啲C9一齊摷，但始終都搵唔到合心水的顏色！所以最終都係用番模型油。隻色係由淺綠(#64)加銀(#159)溝出來。


個車頂噴了啞黑色，睇落算係ok但冇我想像中咁好，不過都唔會改啦。全盒模型最具挑戰性嘅原來係响車底，乜都啤埋一齊，淨係黐膠紙噴黑色部份已經黐到眼都凸埋！銀色部份就更加冇可能黐到膠紙，唯有用手油。


車底除了車轆已經差不多攪掂。內籠除了中間其餘部份噴上啞黑色，包括椅背。座椅再噴多層啞色透明油。


車身裙腳處噴上啞黑色。


為襯番整架車的顏色，車頭燈內胆用黑色但某些部份需用回電鍍銀色，先將整個內胆噴黑，然後用牙簽括走黑色油露出某些電鍍部份。


同樣為了襯番車的顏色，轆拎和門柄一同改為半啞黑色。先將有關零件用開油水浸甩電鍍層，噴上底漆，再噴上半啞黑色(#92)。


攪埋其餘嘅細節後，今年第三架車車出廠啦！









又來幾褔三代淑女大合照先！

我愛波子齊齊砌聚會

昨日6月6日星期日在齊齊砌聚會中欣賞到各位師兄帶去的作品，無論係車、巾、女、狗件件都有番咁上下水準，我呢架好遺憾頭尾拖架都甩咗唔見咗有個烘響度，所以唯有攝埋大家度滔啲光！

Tamiya - 1:24 Porsche 911 GT2 Road Version Club Sport

早排答應過一位Blog友出席六月一個「我愛波子」的齊齊砌聚會，每位出席者都要帶架波子模型出席。雖然以往已經砌過好幾款波子模型，但從Blog上見到啲參加者好認真咁砌，我亦唔想敷衍攞架已經砌好咗嘅出席。

至於砌邊款波子我有幾個主意，1) 富記嘅356A Carrera但以我所知道嘅模型舖都已經冇得賣；2) UT Models嘅911 GT1 Evo但可惜啲膠嘅質素麻麻加上冇乜參考圖片，唔易改裝；3) 富記嘅Cayman S但架車的外型很簡單，冇乜特別；4) 孖星嘅911 GT3或Boxster但已經砌過兩次唔想再砌。在有限的時間下，我選擇了孖星的911 GT2 Road Version，原因係貪佢簡單，雖然冇偈砌，但車廂內有賽車裝備，可以拉吓線改裝吓。

第二次砌這款波子，除了簡單外也是繼356後自己最喜歡的一款911外型嘅波子。之前砌好果架還在，原來那時都有拉線。今次會再加開埋兩度車門，內籠仍是會砌GT2 Evo佈局即落場賽車版。


先打磨整個車殼，但所有賽車的特徵都會保留，包括擋風玻璃前的死火掣位，但車頂的天線口和車頭冚釘就磨去，遲啲會裝番啲蝕刻片釘落去。

打磨好後開始動切割手術首先是玻璃，分開車門及後窗部份的玻璃。


跟住係cut開兩隻車門，好漫長的工序。整咗成晚淨係cut得一隻車門，而且窗框啲邊好幼好易斷，要輕手啲！


繼續cut車門。經過一輪掙扎後，終於兩隻門都cut開咗啦！假組兩隻門發覺啲隙位唔係咁闊，幾滿意。


跟手磨薄門邊，磨薄期間整斷咗一隻門的三角窗框框，但好彩救得番，唔係就前功盡廢。


攪咗兩曰車門後，攪攪其他部份。打磨防滾架和組合兩件尾冚parts，填補尾冚駁口位使它變成一體。


Cut開車門內壁。之後素組車邊panel和防滾架度位。


有時cut嘢真係會上癮，忍唔到手又去開埋個車頭冚，仲開埋個油箱蓋添，真係越玩越大，希望到時唔好大到埋唔到尾啦！


終於開到冇嘢可以再開，磨薄所有邊位後開始進行改裝。首先是用四條膠條裝上車身頭冚框，打磨後頭冚都合得上沒有明顯隙位。


跟着同樣用膠條造出車身的門框，用萬能膠固定膠條。


用打磨機磨薄門框至適當闊度。


再補上畢地。


整車門內壁，用膠條造出車門的厚度


開始製作門鉸，材料是用固定電線的銅片「馬仔」，切開後將一邊捲曲圍着一條0.5mm膠條，如是者整多三個，每扇門兩個。


用萬能膠固定鉸的在車門及車身的位置。


在砌吓停吓的情況下，不知不覺已經五月中，還有差不多兩個半禮拜就到聚會，按現在的進度，相信應該趕不及做埋頭冚下(油箱)的細節，唯有暫時用膠紙封住，等聚會後再整。

開始為車殼和車廂上底漆，因車廂內沒有任何裝飾佈置，車廂和車殼大致都是一樣顏色。近排天氣超潮濕，不適宜噴油，只好噴住底漆先，順便諗吓噴咩色... 但呢頭話天氣潮濕果頭天氣又好轉，仲乾燥得廿幾巴仙濕度，我唔理咁多即刻盡量在兩日內噴好哂油和光油。在未決定噴咩色下，我選擇了最平凡嘅白色(#2)，因為淺色嘅車廂會較容易看到車廂內的細節。噴好後來個素組睇睇先。


開始進入大直路最後七日，要加多幾鞭衝刺啦！開始砌內籠的細節。先砌好錶板和拉部份車箱喉管。


剩餘六日。繼續拉車廂內的線及為兩個滅火器上色。


剩餘五日。油玻璃和窗的黑框。之後將車轆中央噴上黑色，先用紙圈和寶寶貼遮蓋住周邊再噴上金屬底漆再噴上光黑色(#2)。乾後撕去紙圈和寶寶貼，攪掂！


剩餘四日。唔得閒，冇做嘢！

剩餘三日。黐安全帶，油車尾燈


剩餘兩日。還有很多鈿節未完成，在組合玻璃窗時發覺三角窗的玻璃唔係咁啱哂士和太厚，要加以打磨和磨薄。


之後組合其餘零件，包括所有玻璃窗、尾翼、倒後鏡、頭尾拖架(尾拖架移到中間，但頭拖架後來甩咗不知所蹤！)、水撥、自製車頭死火制...等等。架車基本上已完成，但當初衰多手挖空了車頭冚中央的油箱蓋，因趕不及整油箱，而家得個窿！要再諗諗辦法填補或加個油箱入口裝假狗。


最後一日。今天的起心肝去買個透明盒，然後回家攪埋啲手尾。發覺原來兩條死氣喉還未上色，嗱嗱淋攪掂埋佢，先上深銀色(自行調教)做底色，然後掃上Mr Metal Colour 的電鍍銀(#211)，再用綿花棒輕輕打磨。


做塊假狗嘅油箱口塞住車頭冚上嘅窿，先將切了出來的油箱蓋油上銀色，在周圍輕輕鑽啲窿來模仿鍋釘，黑色圓圈(入油口)是用其它模型不要的車牌零件慢慢出形狀及磨薄，然後又鑽啲仿鍋釘，用膠紙貼在頭冚底部固定油箱口，勉強攪掂。


今日係D-day，總算係粗粗地攪掂哂，可以拎出去獻吓醜！