2009 model project summary

零九年好快又將會過去，趁一零年還未來到前又來派派零九嘅成績表。這一年來每次到模型舖都經常忍手唔買，但越忍手就越失控結果仲買得多過舊年！好多時都係模型做緊特價唔買好似唔扺嘅心理下買，結果買吓一盒；買吓又一盒...！

總括所有花費在模型及有關物品(包括模型油)上大約多過去年$1k多!主要係因為今年買咗個新泵，撇除後花在模型本身上其實少過舊年，唯有咁樣來安慰自己啦！

今年架上又多咗七盒新模型，啲盒就來疊到頂住天花板啦！要加快進度及買少啲至得啦。

然而今年砌好的模型亦相計較去年多。今年亦首次購入機械人模型想體驗吓砌機械人的樂趣。又來統計吓今年嘅模型數字：

購入模型: 二十三盒 [Mazda Mazdaspeed Roadster ; Ferrari 365 GTB4 (Special Edition) ; Isuzu BXD-30 Bonnet Bus ; Mitsubishi Fuso Canter 2-ton truck ; Toyota '80 Hilux Highrider ; Lupin III & Fiat (500) ; Nissam Skyline GTR ; Nissan Cube EX ; Sauber Benz C9 1988 ; Austin Mini Cooper 1275S Mk. I ; Lexus SC Mobil 1 2006 ; Porsche 935 "Martini" ; Nissan Cube SX ; Nissan Fairlady 370Z ; Citroen Traction 11CV ; NIssan Fairlady 240ZL ; VW New Beetle ; Mazda 787B ; Porsche 911 ; Porsche 917K 1971 Daytona Winner ; Mercedes Benz AstrosBlack Edition ; Chevrolet Corvette Coupe ; Brutishdog ATM-09-GC]

購入蝕刻片、水紙及改裝部件: 四份 [Sauber Benz C9 (P/E) ; 2 x Ferrari 312T (Decal) ; Ferrari F189 (Decal) ]



今年開工但未完成模型: 十盒 [MercedesBenz 540K Cabrio ; Isuzu BXD-30 Bonnet Bus ; Toyota MR-S Veilside ; Austin Mini Cooper 1275S Mk. I ; Sauber Benz C9 1988 ; Mercedes Benz CLK DTM 2000 Tean Original-Teile ; BMW 320i Racing ; Ferrari F-2000 ; Mercedes Benz Actros Black Edition ; Brutishdog ATM-09-GC]

完成模型: 十六盒 (見圖)

Tamiya: Suzuki GSX1100S Katana (完成日：零九年一月)


Tamiya: VW Karmann-Ghia Coupe (完成日：零九年二月)

Hasegawa: Toyota Celica 1600 GT (完成日：零九年三月)

Tamiya: Mazda Miata (完成日：零九年三月)

Tamiya: Lamborghini Countach LP400 (完成日：零九年三月)

Fujimi: Mitsubuishi Pajero Mini (完成日：零九年四月)

Fujimi: Nissan Cube EX (完成日：零九年六月)

Fujimi: Ferrari 365GTB4 (Daytona Spciale) (完成日：零九年八月)

Tamiya: Nissan Fairlady 300ZX Turbo (完成日：零九年九月)

Tamiya: Porsche Boxster (Special Edition) [Restored]  (完成日：零九年九月)

Tamiya: Volkwagen New Beetle (完成日：零九年十月)

Tamiya: Nissan Fairlady 350Z [Restored] (完成日：零九年十月)

Fujimi: Toyota bB Styling Package Version A [Restored] (完成日：零九年十月)

Tamiya: Porsche 935 "Martini" (完成日：零九年十一月)

Fujimi: Ferrari 512 BB (完成日：零九年十一月)

Hasegawa: Volkswagen Type 2 Pick-up Truck (1967) (完成日：零九年十二月)

再來兩張大合照，但可惜架甲蟲仔送咗比人，不能出席！

Spray Booth, making of

一路以來噴模型油都要擇日擇時間做，要等到夜闌人靜才可以入廚房擺檔開工，皆因家人常有微言話唔衛生，這亦無可厚非畢竟廚房是整嘢食的地方噴油會釋放有毒物質，所以廚房絕對不是一個用作噴油的地方。但可惜家中只有廚房才有抽風機，所以逼住要在廚房進行。每次進行噴油前都要做一大輪準備功夫例如開大哂啲窗、開行抽氣扇和收埋所有見到的食具和食物才開始。噴完後又要做一大輪善後，好不麻煩！

因此一直都想有個噴油箱可以在房內進行噴油，又不會攪到成間房都係油味，坊間雖有些現成的噴油箱但索價成千元一個，好貴唔捨得買，放且我知道有好多師兄師姐的噴油箱都係自製的，所以應該唔一定要買現成嘅。因家中地方淺窄不可能整一個固定的噴油箱，噴完一定要收得番埋唔阻地方。

趁近年尾冇乜心機砌模型，多著時間的起心肝上網摷啲DIY噴油箱資料(原來都唔少)，其中一個在網上搵到嘅比較可取，所以照辦煮碗買材料回來自己動手做。

材料：塑膠儲物箱、玻璃膠(日頭城)；直徑六吋的再封食物盒、抽油煙機的過濾綿(雜貨店)；直徑六吋的抽氣扇(鴨記)；直徑六吋長六呎的風琴式抽氣喉(新填地街至痕)；光管燈(電器舖)；燒烤網(超市)。可惜我唔係一次過買哂所有材料，不能先來張大合照。

開工：
首先用辣雞將食物盒的蓋中央和盒底溶開再打磨好溶口


用辣雞以同一方法在儲物箱底開一個直徑和食物盒盒蓋相約嘅窿，兩側開兩個小窿作固定抽氣扇的鏍絲位，在箱底近角處開個窿讓抽氣扇和光管燈的電線通過。打磨好切口後將抽氣扇安裝在箱底的內部。


裝上光管燈和駁好電線後，噴油箱內部大致完成。駁上電源，初步測試成功！


下一步是裝設抽風喉。先將食物盒盒蓋和盒身合上，將盒身套入風琴喉中，用索圈索緊盒身。取出盒蓋用夾固定在箱底上的位置，唧上玻璃膠將整個盒蓋周邊黐實。因玻璃膠需時乾透，所以留到最後才做這步驟。


整個工程大致完成，但還要加裝抽氣過濾減低噴油產生出來的飛沫排放。唔係嘅話我就舒服；街外啲人就中哂毒！先裁一塊對摺同抽氣扇面積相若的燒烤網套在抽氣扇前面，再裁一幅同樣大小的抽油煙機用的過濾綿，將過濾綿放在對摺燒烤網的中間，用萬字夾夾實。

等了兩日玻璃膠乾透後放開夾子及裝上抽氣喉，初初都好似好隱陣，但當抽氣喉扯得太行時，一部份的駁口被輕微扯開，我見駁口不是那麼隱固索性將整個蓋扯甩，果然唔使好大力就已經整個扯甩，得出的結論是玻璃膠不能承受太大的扯力，長此下去遲早都會甩！冇辦法唯有再諗過第二個隱固啲嘅辦法啦...！

為求令抽氣喉駁口更加隱固決定加裝四枚小鏍絲鑲在盒蓋裏。首先取出藏在盒蓋內的藍色膠圈，用辣雞分別在盒蓋和箱底同一位置開四個小窿，從盒蓋裝上鏍絲，因鏍絲太長會頂住抽氣扇，上緊後要從箱底內部鋸短露出的鏍絲。


之後裝回抽氣扇及膠圈再駁上抽氣喉，今次隱陣得多！收藏方面亦很理想。

急不及待測試吓抽風效果。首先在箱內舖上報紙及駁上抽氣喉，固定後開抽氣扇感覺到有風從箱內吹出來，報紙亦輕微被谷起，當嘗試噴畢地時有很多飛沫吹番出來，可能是駁口漏風，要再加玻璃膠封實。測試完後發覺過濾綿亦黐滿畢地粉末，証明抽氣扇也有發揮其作用。


收補漏風問題，再用玻璃膠將盒蓋周邊黐實。今次有四枚鏍絲掹住不是單靠玻璃膠，所以應該冇問題。待乾透後再進行測試，這次沒有感到有風吹出來，報紙亦沒有被谷起，問題應該解決了。但當噴畢地時，仍有飛沫吹出來但沒有上次般嚴重，相信是對著密封箱底噴油反彈出來的現象，無可避免。如各位師兄師姐認為我的理解是錯的，不妨留言教吓小弟個噴油箱究竟有甚麼出了錯。

雖然這個噴油箱不是十全十美，但都收貨啦...！以後唔使等到半夜三更先至可以噴油啦！

最後要特別多謝blog友Carman提供木箱給我改裝做噴油箱，雖然冇用到個木箱，但卻啟發到我自製噴油箱的念頭。

Hasegawa - 1:24 Volkswagen Type 2 Pick-up Truck (1967)

臨近年尾唔想再開新的模型，所以趁這段時間完成一吓啲未砌好的模型。這盒模型是朋友要求砌來情景模型的。但三分鐘熱度過後就不了了知！架車就只噴了外殼連光油都未上。

這架車是中古車，所以車身都用了較古老的顏色配搭─Cream (#1+#4) + 綠色(#60)。車斗的仿木條油上啡色(#119)。


這架車實在很簡單，直砌沒有乜好講。唯一泵把和車轆蓋要浸掉電鍍層然後再上油。