Flooding!

臨近過年想將家裏擺到亂七八糟的模型整理一下，買咗個連地下一共四層嘅層架將所有模型放哂上去。買架嗰時都已經預大咗個size以防日後唔夠用，但唔放尤自可，放咗大約90%嘅存貨已經差不多塞滿哂其中三層，只剩餘頂層可以放埋其餘嗰10%。個架睇來好似間模型舖咁。
今日終於set好個架，所有模型都擺哂上去，來一幅大哂冷，此外還有十盒左右的1:43手辦未放上去，咁細盒都唔知塞响邊處好。

雖然比起其他模型發燒友我啲存貨可能係蚊脾同牛脾，但都覺得好震撼。最终成個架都塞滿哂現有的模型，冇地方放日後入嘅新貨。但咁都好嘅，起碼以後有衝動買模型嘅時候諗吓個塞到爆嘅架至少可以諗清楚忍吓手。不過第時當個架有空位又可能會心郁郁。
睇見啲存貨自己都覺得好誇張，平時唔覺唔覺買吓一盒；買吓又一盒，一旦囤積起來原來可以咁震撼。唉，呢世都唔知砌唔砌得哂咯！

Tamiya - 1:12 Suzuki GSX1100S Katana

二零零九年第一砲。過往砌四個轆砌到滯滯地，今次轉吓口味砌兩個轆。呢盒係復刻版，有時覺得砌吓啲中古車冇乜大包圍成日响街見到行來行去都幾有親切感。

正因為係街車，所以parts都較賽車少。首先將所有需要加工磨去接駁口的部件黐埋和磨滑。


引擎的部件唔係好多，好快就攪掂。

將前後brake碟通氣孔鑽開。

死氣喉填補接駁口後上底灰及上色，muffler噴光黑色(#2)

死氣喉前歧管部份噴啞黑(#33)



車殼部份去除駁口後上底漆及上色(#8)，貼水印紙再噴光油。

頭燈應在合上頭罩時裝上，但因要去除接駁口頭罩一早已合上，所以頭燈亦要改動吓才可裝得上。頭燈是頭罩與車身的主要連接點，頭燈接駁處要用萬能膠強化 (箭咀)。

Models on sale

昨日行過旺角環記見到有搬遷大清貨，我走入去睇吓有冇平貨執，原來係買滿$500有六五拆優惠，以環記的價錢比第二啲店舖高，六五拆後計落都應該有些少着數，但可能個優惠已經有咗一段日子，又或者有好多荀貨都已經搬走咗，所以選擇唔係咁多。最後買咗兩盒富記模型(見圖)和六樽郡氏油埋單三百廿幾蚊，都算抵嘅。 

架Mazda係諗住整o黎送比朋友的。不過朋友知道後有所要求，佢近日買咗對Dr Martens Boots(見圖)佢話架車嘅顏色要襯番佢對Boot喎。唔，有啲難度噃！！諗諗佢先。

o幣啦，零八年年結先講過零九年要控制自己唔好亂買模型，開咗年唔夠一個星期已經入咗兩盒。真係罪過，罪過！！