Aoshima – 1:24 Delica Space Gear Super Exceed Crystal Lite Roof

繼續收拾殘局... 呢盒係在未有氣泵之前買嘅，所以何時買的記錄都冇！

模型的狀況：車窗玻璃窗黑邊已經油好哂，車底和車廂亦上好色(係用筆油嘅所以表面唔係好平滑)，車殼只係下半截噴了底漆和噴了珍珠白透明油，相信係用噴罐噴的所以噴得十分之唔平均。四個早已安裝好的車轆已全部脫落，咁嘅狀況每次模型大執位時都真係諗過想掉咗佢，但見盒模型已砌好一大半，唔想就咁放棄，總知就係雞肋啦！擺吓擺吓就擺到今時今日。前陣子又一次模型大執位攞番出來，決定今次要徹徹底底埋佢單！


首先去除車殼上的舊油，但不打算用過往用開油水浸泡方法皆因唔想用咁高嘅成本去攪呢盒雞肋。我改用砂紙(400和1000號)濕磨整個車殼，打磨過後噴上灰底漆，車殼表面看不到舊漆遺留下來的痕跡。


打通車頭鬼面罩的實心入風口。


車身顏色想用獨特啲嘅雙色配搭。早排自己用銀油和黃油溝了樽不倫不類似是淡金色嘅油，我把心一橫拿它來試試效果。噴了車身中間部份再加多層super silver (#159)，車身下半截噴上burnt iron (#61)，兩隻色夾埋真係... 幾特別，但睇來睇去都覺得金色車身好娘唔係好順眼，最終都係歸於平淡噴番黑色！


張貼紙已經乾過條鰔魚照計應該一落水就會散哂，但唔信邪又要試試。先將貼紙上髹一層透明光油，然後盡量貼近圖案邊緣剪下貼紙浸水，雖然貼紙仍有散但冇咁嚴重，一輪圖案重組，勁落軟化劑及風筒吹乾終於五個貼紙救番三個！


黐好貼紙後攪吓啲甩轆，先從煞車碟拔除留在裏面的斷軸。


轆拎唔打算用電鍍，用舊牙刷和牙膏擦除表面的電鍍層後噴上底漆。在轆拎中央鑽個宜徑2mm嘅窿用來連接新軸。


用2mm的膠條做番四支新軸，將新軸插入煞車碟，露出的一小截來連接轆拎。


套上車轆假組一次，效果ok雖然啲轆已經不可轉動。


轆拎噴上burnt iron (#61)再噴稀釋黑色tone down，最後噴上光油。


之後的步驟只是照著說明書完成。