Tamiya - 1:24 Porsche 959 (Part 2)

因這盒模型我是買來砌送比人的，我打算九月中起貨，所以想拿拿林搞o店佢先。

製作過程日誌

承接上篇網誌: Tamiya - 1:24 Porsche 959 progression report (Part 1)

第四日《七月十八日 星期五》:今日嘗試研究吓個氣泵，睇吓整唔整得番。拆開控制氣泵開關的儀器發覺斷電開關的運作原理其實是利用一顆可扭動的鏍絲模，當氣壓增加時，鏍絲模會被推向對下的開關掣，直至開關掣完全被壓着時便會停止泵氣。咁樣當氣壓達到某個程度，個泵就會停止運作。我發覺個泵去到差不多30PSI個開闢掣就被壓着，所以個泵永遠去不到噴油所需的氣壓。我將粒鏍絲模調高些，個泵果然可以去到40PSI，但40PSI之後我就聽到個儀器漏氣，所以個泵最盡都係去到40PSI而且唔會停。40PSI都可以勉強用來噴原子灰，但噴其他油(尤其是光油)就唔得啦。冇法，馬死落地行，唯有用住頂住檔先啦！

將所有的車殼和內籠的部件噴上灰色的原子灰。待乾後用膠紙遮蓋內籠要噴較淺色的地方，然後噴上半光深灰色作主色，用嘅顏料係郡氏36號German Gray Green。

第五日《八月四日 星期一》:還未的起心肝買泵，惟有砌住其他部份先。 較早前已經噴好內籠，現在只是將所有部件組合起來，結果都幾滿意(pic 1)。之後車殼要噴白灰，因我想車身噴白色(pic 2)。
pic 1pic 2

第六日《八月五日 星期二》:我打算打開司機位那邊的車窗，首先將整塊車窗貼於車殼劃出車窗的輪廓，用膠紙遮住保留的部份以免在開刀時括花，小心地用工具移走車窗部份尤其是窗框上部份幼幼的框架，要特別小心(pic 3)。
pic 3

第七日《八月六日 星期三》:今天打大風成日悶响屋企。塗所有窗邊橡膠框部份，這盒模型的橡膠框部份全部位於玻璃部份而不是在車殼部份，所以睇位上色較艱難。之後用1500號沙紙打磨全車身，然後上色，我今次首次用郡氏GX1號 - Cool White，發覺質感唔錯，比普通白模型油來得實和厚。早知當初唔噴架Carrera GT住啦！

第八日《八月七日 星期四》:今日淨係為車尾箱部份噴銀色(pic 4)。
pic 4

第九日《八月十日 星期日》:諗住同架車噴光油，但發覺車頭蓋未貼車廠徽章，所以即刻攞張水印紙出來貼，點知在剪裁其間個徽章跌鬼咗搵唔番。而家真係企咗响度，唔知點好！真黑仔！

第十日《八月十一日 星期一》:諗來諗去都唔知點好，冇咗個徽章就等於砌賽車冇咗其中一截拉花，唔係好成事。唯一的辦法就係响第二盒Porsche模型「借」個徽章一用。檢查過我的模型清單後發覺我的Porsche模型都頗多，終於揀了一盒作「臨時犧牲品」，它就是UT Limited 出產的Porsche GT1 Evo。因為盒模型的手工質素都頗「求其」所以買咗返來咁耐都冇乜衝動想砌，今次正好比佢壯烈犧牲吓。

拿拿林貼好個徽章，唔想重滔昨日覆轍，但因天氣太潮濕所以未噴得光油住。

第十一日《八月十二日 星期二》:未噴光油前將車身內籠在完成後可能看見到的地方油黑(pic 5)。然後將車身用海綿在水中洗洗清除殘留在表面的油漬。隔了幾個鍾開始噴光油，我以為今天日間咁好天，夜晚又
咁清，濕度應該唔會太過高。點知一噴，光面變成啞面，心知不妙，再查一查個相對濕度原來有成8x%，唔怪只得啦，唯有改日再噴過。
pic 5

第十二日《八月十三日 星期三》:今日天氣比較乾燥，終於可以噴埋啲光油。較果都算可以過得自己嗰關咁啦。因我是用罐裝光油噴漆，所以可能會噴得比較厚，要多幾日時間等啲油乾透後才可以打磨拋光。

同場還加映為另一副爛尾鐵馬模型(Ducati  916)噴埋光油兼執埋手尾，因我已冇乜興趣砌鐵馬，加上唔係咁鍾意之前噴落的顏色(深綠色) 所以求其噴好油磡埋所有零件就算，冇花太多心機去打磨和拋光。目的只是盡量完成嗰啲開咗頭但遲遲都未完成嘅模型。

第十三日《八月十八日 星期一》:打磨和拋光車身，組合其餘部件。車身和車底比較難裝嵌前擋風玻璃可以在裝嵌後才裝上。

-- 攪o店，食碗麵！--